Двајца американски конгресмени со поддршка за уставното име на Македонија

Време е Грција да ги тргне своите забелешки од политичката арена и на историчарите да им ги остави дебатите за Александар Велики или за античките Македонци, изјави републиканскиот конгресмен Марк Заудер пред колегите во американскиот Конгрес. Тој додаде: “ Би сакале да им дозволиме на Грците да придонесат во долготрајната традиција на поддршка на демократските вредности со тоа што ќе им дозволат на луѓето од Република Македонија да се нарекуваат себеси така како што отсекогаш се нарекувале.“ Настапот на Заудер е реакција на резолуцијата што пред Конгресот и сенатот на почетокот на август годинава ја поднесоа неколкумина конгресмени и сенатори и во која се бараше почитување на привремената спогодба за името, а Македонија беше постојано именувана со кратенката ФИРОМ. Заудер на своите колеги им порача дека Македонија е една од земјите кои произведуваат стабилност во регионот и дека е докажан пријател и сојузник на САД. Конгресменот од Демократската партија, Бил Паскрел во својот настап пред американскиот конгрес, вчера изрази загриженост што во текстот на резолуцијата од август, Република Македонија се именува со кратенката ФИРОМ, потсетувајќи ги колегите дека земјата досега е призната од 118 држави во светот под нејзиното уставно име.