Десетици загинати во земјотрес во Индонезија

Како што соопшти службата за цивилна заштита во земјотресот кој го погоди крајбрежјето на индонезиската провинција Ачех досега загинаа најмалку 54 лица, а се урнаа десетици згради. Стотици луѓе се повредени. Се стравува дека бројот на жртви значително ќе се зголеми со оглед дека под урнатините се наоѓаат уште луѓе.

Земјотресот со магнитуда 6,5 се случи во 8 часот и 13 минути по локално време со епицентар 18 километри североисточно од областа Пидије Јаја на островот Суматра.

„Не издадовме предупредување за цунами“, изјави претставник на индонезиските власти за светските новински агенции.

Населението, војската и полицијата ги пребаруваат урнатините во околината на епицентарот на потресот, а локалните власти велат дека се итно потребни машини за копање, и опрема и материјал за итно згрижување на луѓето.

Во главниот град Џакарта претседателот Џоко Виодо им нареди на сите државни служби да се вклучат во спасувањето.

Индонезија се наоѓа во таканаречениот „Пацифистички огнен прстен“, и е подложна на силна сеизмичка активност и вулкански ерупции. Над 100.000 лица загинаа во Ачех  во катастрофалното цунами кое беше предизвикано од силен земјотрес на 26. декември 2004. година. Бројот на загинати во цела Индонезија тогаш изнесуваше околу 170 илјади луѓе.