Државниот врв ја разгледува нацрт рамката на Нимиц

Македонскиот државен врв го разгледува првичниот нацрт текст наречен Рамка за разбирање што го предложи медијаторот во спорот со името Метју Нимиц на вчерашната рунда преговори во Њујорк, информираше денеска македонскиот министер за надворешни Антонио Милошоски. Тој изјави дека „насоките и начелата во текстот може да се оценат како позитивни, додека за дел од нив може да се достават аргументирани забелешки“. Министерот не прецизираше детали, посочувајќи дека се очекува официјалната верзија на документот која треба да ја донесе преговарачката делегација. Нацрт-рамката на Нимиц треба да биде основа за наоѓање решение на проблемот. Нимиц за две до три недели треба да допатува во регионот.