Дружењето поважно од резултатот!

Речиси два часа одличната игра на македонските ракометари им ја грееше душата на неколку стотици навивачи кои во живо на два големи екрана во дворот на германската амбасада во Скопје го следаа натпреварот против Германија. Иако домаќини беа германските дипломати, поголемиот број од присутните навиваа за Македонија.

Греано вино, скопско пиво и братвурст

Стана традиција германската амбасада во Скопје да организира заеднички следења на важни спортски натрпевари во кои настапува македонската или германската репрезентација. Синоќешниот дуел ги собра на исто место Германците кои живеат во Скопје, германистите и голем број Македонци, пријатели на Германија. На студот од неколку целзиусови степени под нулата му пркосеа на типично германски начин: со греано вино, пиво и оригиналниот колбас.

„Почнавме во 18 и 30, за половина час-триста колбаси. Се изедоа 300 оригинални германски братвурст колбаси, сега гостите можат да продолжат со греано вино и со скопско пиво“, вели човекот задолжен за скарата.

Тесна победа за Германија

Домаќинот, заменик амбасадорот Валтер Лојкс призна дека Македонија била рамноправен противник.

„Беше многу тесна победата. Македонците играа одлично што е навистина фантастично имајќи го предвид фактот дека Македонија по бројот на жители е четирисет пати помала од Германија“.

На полувремето кога резултатот беше изедначен Френк Штусел од одделот за култура во Амбасадата не сакаше да прогнозира, но рече дека ќе се радува без оглед на епилогот.

„Не знам, не би сакал ништо да прогнозирам. Само можам да претпоставам дека играта и натаму ќе биде добра а натрпеварот интересен. Каков и да е резултатот на крајот ќе се радуваме бидејќи ние сме Германци а живееме во Македонија. Така што за нас нема лош резултат“.

Културното аташе Катерина Нојман навиваше за Македонија:

„Македонија е сега мојата земја домаќин, Македонија е мала земја и и посакувам среќа, се надевам дека вечерва ќе има успех“.

Бројните гости беа задоволни од гостопримството. Германија и Македонија се вистински пријатели и кога ќе се соочат на спортските терени заедничкото навивање е вистинско уживање.

„Комлекс на настани, луѓе, Германци, наши, се чуствува блискост, нема непријатели има само две различни страни“, велат гостите.

На крајот честитки примаа оние кои го бодреа германскиот тим со признание дека македонските ракометари беа рамноправен противник. Дружењето, навивачката еуфорија, возбудливиот и неизвесен натревар не оставија место за разочарување од поразот.

Автор: Горан Петрески

Редактор: Ж.Ацеска