Дупката во буџетот ќе се крпи со повисоки даноци и придонеси?

Повисоки придонеси, зголемување на данок на добивка, па дури и на ДДВ? Фискалната консолидација наметнува болни мерки, но неизвесно е кои од нив ќе станат и реалност. Експертите се поделени, бизнисмените загрижени!

Поволни странски позајмици во комбинација со зголемување на даноци - Владата сериозно ги разгледува опциите кои ѝ стојат на располагање за интервенција во насока на фискална консолидација. Се бара начин како и од каде да се покрие хроничниот недостиг од пари, но и да се санираат наследените дупки од претходната власт. Според информации на Дојче веле, во консултации со експертската јавност веќе се разгледуваат неколку опции. Клучната дилема околу која се кршат копјата е кое од решенијата да се примени веќе со наредната фискална година. Во игра се повисоки придонеси, поголем данок на добивка, а на маса е ставен и предлог за зголемување на данокот на додадена вредност:    

„Во игра се неколку опции, а на маса е и прашањето за данокот на додадена вредност. Евентуално да се оди на зголемување на ДДВ за 2 до 3% со што би се обезбедил сериозен прилив на финансиски средства со кои би се покриле огромните буџетски дупки. Ефектот од ова би бил голем, а последиците минимални. Некои производи ќе поскапат незначително, а дел и ќе останат со исти цени. Сѐ ова засега е на ниво на идеја и предлог, но нешто мора да се менува бидејќи пари нема“, открива за Дојче веле експерт вклучен во целиот процес.

Непопуларните мерки се неопходни!

Клучната дилема според него е дали, колку и од кога да се корегира персоналецот и данокот на добивка. Интервенциите можеби се непопуларни, но се неопходни за подобрување на состојбите:

„Апсолутно се потребни непопуларни мерки, како на пример онаа за ДДВ. Или ќе имаме сериозен и храбар министер за финансии или повторно нема да се обезбедат ефикасни политики кои ќе генерираат развој и ќе ги покријат дупките. Па само годишно во Фондот за пензиско се префрлаат по 500 милиони евра, што е трагедија. Се протежира персоналецот да се зголеми на 18%, но тврдам дека оваа мерка ќе демотивира и нема да го даде посакуваниот ефект. Ако сакаат екстра пари минимално нека не ги чепкаат персоналецот и данокот на добивка, или максимум до 12%, но не од наредната година, туку евентуално од 2019-та“, коментира тој.

Како да се пополнат буџетските дупки?

Од Министерството за финансии категорично отфрлаат каков било простор за евентуална промена на данокот на додадена вредност, но и не откриваат кои и какви ќе бидат евентуалните интервенции во даночниот систем.

„До конечното решение не сакаме да коментираме ништо, но за интервенции во данокот на додадена вредност воопшто не станува збор. Идејата на Владата е воведување фер даночен систем кој за најголем дел од населението нема да значи никаква промена“, велат од Министерството за финансии. 

Експертите бараат поголема транспарентност

За дел од експертите е проблематично што Владата сѐ уште тактизира и не открива конкретни детали за плановите. Дел од нив предупредуваат да не се избрзува, односно добро да се обмисли, но и образложи:

„Треба да излезат и да кажат што размислуваат. Конкретни решенија, нови предлози никаде нема. А еве има сознанија дека разгледуваат опции за менување, дали во делот на ДДВ, дали рамниот данок... Треба да се образложат предлозите и како тие ќе ја подобрат состојбата со евентуална промена на даночниот и финансискиот систем. Настрана како беше досега. Ние критикувавме 10 години дека претходната власт не чини и дека е расипничка. Но сега таа ја нема и можеби тој истиот даночен систем со прекинот на расипничката политика ќе ги даде добрите резултати. Оти контрадикторно е да речеш, имало расипничко трошење, а ќе го менуваш системот. Режимот сега не е веќе присутен, сега треба да имаме резултати само заради тоа што режимот е симнат. Но ако го критикуваме даночниот систем, тогаш ќе ги рехабилитираме дека не биле расипници, туку дека системот им бил погрешен“, реагира поранешниот министер за финансии Џевдет Хајредини. 

Загрижени се и бизнисмените

Неизвесноста создава нервоза кај стопанствениците кои стравуваат од несакани ефекти. Дел од бизнисмените апелираат владата активно да ги консултира и нив во носењето на мерките. Посебно во оние што се дел од даночниот систем. Премиерот Зоран Заев деновиве најави нови давачки и раст на даноците за, како што рече, финансиски да ги зајакне општините. Сепак не прецизираше кои даноци ќе бидат опфатени и колку ќе се придвижат стапките нагоре. Единствено што досега во јавноста објасни е идејата за зголемување на персоналниот данок на 18%, но само за оној дел од примањата што е над 60 илјади денари месечно. Сѐ под ова ќе остане по старо. 

Опозицијата, пак, критикува дека плановите на власта да ги зголеми даноците ќе има повеќекратни штети врз економијата. Предупредуваат дека граѓаните ќе се соочат со зголемување на данокот на добивка и на придонесите. Идејата на власта, според нив, била мерките една по една да се спроведат постепено за евентуално да се амортизираат шоковите.

Министерот Тевдовски (д.) најави можност за издавање еврообврзница

Догодина можна еврообврзница

Во игра е и засилување на задолжувањето на странските пазари. Министерот за финансии Драган Тевдовски неодамна во интервју за Блумберг најави и можност за издавање еврообврзница во текот на 2018 година. Ова, според него, е една од опциите за покривање на тековните трошоци и дефицитот кој според плановите треба да се намали на 2,9%.

Експертите сметаат дека власта треба да размислува на подинамично задолжување на странските пазари, каде условите стануваат поповолни, но предупредуваат парите доминантно да се насочуваат кон стопанството и негова поддршка, не само за креирање работни места, туку и за зголемување на платите.

Дека на македонската економија ѝ се потребни серија мерки за подобрување на состојбите сугерираше и Меѓународниот монетарен фонд. Минатиот месец тие препорачаа подобрување на ефикасноста во наплатата на даноците, зголемување на старосната граница за пензионирање, поскапување на горивата. Власта тогаш изрази подготвеност за примена на дел од мерките, но нагласи дека не размислува за промена на условите во делот на пензионирањето.

Како залудно да ги потрошите парите на даночните обврзници

Летот на светкавата свиња

Германските даночни обврзници платиле 100 илјади евра за скулптура на лебдечка свиња "Glitzerschwein" во градот Хале во јужна Германија. Скулптурата тешка 500 килограми е подигната од градските власти како симбол на историјата на Хале — стадо свињи наводно ги откриле првите резерви на сол во градот. Кристалите ги симболизираат зрната сол.

Како залудно да ги потрошите парите на даночните обврзници

Многу пари- мал поглед

Градчето Бракел во близина на Падерборн првично одлучи да изгради платформа за рибарење на локалното поточе. Потоа, градските власти одлучија да изградат и платформа за посетители вредна 6.200 евра, која треба да ги донесе чекор поблиску до природата.

Како залудно да ги потрошите парите на даночните обврзници

Соларни катни за отпадоци

Градот Потсдам воведе нови, швајцарски соларни канти за отпадоци за вртоглава цена од 10.500 евра за парче. Кантата има вградена преса која го зголемува нејзиниот капацитет, и електронски индикатор за тоа колку е полна. Но, цената сепак боде очи доколку се има предвид дека „регуларната“ канта чини 300 евра за парче.

Како залудно да ги потрошите парите на даночните обврзници

Очи болат

Уметничка инсталација или фрлање пари? Локален уметник буквално позлати една стара куќа во сиромашен кварт на Хамбург, прекривајќи површина од 300 метри квадратни со златни ливчиња. Локалните власти донираа повеќе од 85 илјади евра за проектот.

Како залудно да ги потрошите парите на даночните обврзници

Гаража за духови

Јавната гаража во центарот на Винсен, во близина на Хамбург е отворена со месеци. Сепак, 534 паркинг места во гаражата се речиси секогаш и целосно неискористени. Градот плати речиси 11 милиони евра за гаражата, а како ќе го покрие трошокот останува да видиме во следните години.

Како залудно да ги потрошите парите на даночните обврзници

Исушената липа

Оваа 400 години стара липа во Оберурсел во близина на Франкфурт полека умира. Локалните власти одлучија да се простат од неа искористувајќи ја како дел од уметнички проект наречен „Минување на времето“. Околу славното дрво се поставува метална рамка без стакло. Цената е 77 илјади евра, плус загубената шанса да се искористи дрвото за греење.

Како залудно да ги потрошите парите на даночните обврзници

Повеќе пратеници, повеќе проблеми

Благодарение на германскиот изборен систем и резултатите од минатомесечните парламентарни избори, новиот парламент ќе има повеќе од 700 пратеници, или над 100 повеќе од вообичаено. Зголемувањето на бројот на пратениците ќе ги чини граѓаните 75 милиони евра од буџетот само за 2018 година, велат од Федерацијата на даночните обврзници.

Следете нѐ