Ердоган во тесно - компромитирачки снимки од телефонски разговори

Спорот околу наводната корупциска афера на турската влада се заострува. Опозицијата во Анкара бара оставка на премиерот Реџеп Таип Ердоган, како што објавуваат повеќе медиуми. Повод се наводните снимки на телефонски разговори на Ердоган и неговиот син Билал, кои синоќа се појавија на интернет. Снимките, според опозицијата, докажуваат дека тие двајцата е погрижиле за исчезнување на огромни суми пари за да се обезбедат против истрагата на обвинителството во врска со корупциската афера.

Кабинетот на турскиот премиер Реџеп Тајип Ердоган синоќа соопшти дека снимките што се појавија на интернет се лажни.

Снимките од разговорот кој посочува на корупција во Владата, се појавија откако бше објавено дека турската полиција прислушувала најмалку 7.000 луѓе, меѓу кои и премиерот Ердоган, членови на неговиот кабинет, шефот на разузнавачката служба на Турција и новинари.

Во наведената снимка двајца мажи за кои се тврди дека се Ердоган и неговиот син разговараат за тоа како да се ослободат од голема сума на пари од нивната куќа. Разговорот наводно бил воден на 17 декември, на денот кога започна полициската антикорупциска акција, при која беа приведени поголем број лица блиски до владата на Ердоган, меѓу кои и синови на тројца министри.

„Оваа снимка е неморална, лажна и целосно невистинита, нагласи кабинетот на Ердоган“, најавувајќи дека премиерот во врска со ова ќе покрене „законска постапка“.

Турските провладини весници „Јенисафак“ и „Стар“ вчера објавија дека полицајци приврзаници на Фетулах Ѓулен, турски имам кој живее во САД, цели три години ги прислушувале телефоните на турскиот премиер, како и на бројни политичари и бизнисмени.

Ердоган ги обвинува противниците од влијателната група на Ѓулен дека се однесуваат како „држава во држава“, со цел соборување на неговата Влада со поттикнување голема корупциска истрага против негови блиски соработници.

Документите за шпионирање ги откри новоименуваното Обвинителство што е воспоставено по масовните смени во полицијата и обвинителството што ги спроведе Владата како одговор на корупциската истрага од декември минатата година. Корупцискиот скандал, во кој се вмешани блиски соработници на турскиот премиер, претставува еден од најсериозните предизвици во 11-годишното владеење на Ердоган, во пресрет на локалните избори во март.