ЕУ – Украина

Украинскиот претседател Виктор Јушченко денеска во Брисел вети дека ќе се најде мирно решение за политичката криза во неговата татковина. На средбата со шефот на Европската Комисија Жозе Мануел Барозо тој нагласи дека за окончување на кризата се неопходни нови парламентарни избори. Јушченко исто вети дека сите страни во спорот ќе ја прифатат одлуката на Уставниот суд, кој денеска расправа за решението на Претседателот да го распушти парламентот. Домаќинот Барозо побара да се најде решение во склад со демократските принципи и правната држава. Во една демократска држава нема проблеми што не можат да се надминат со политичко решение – нагласи Барозо. Тој призна дека кризата е сериозна и дека ЕУ е многу заинтересирана за зачувување на стабилноста и демократијата во Украина.