Иран ја прекина потрагата по преживеани од земјотресот

Спасувачките екипи во Иран ги прекинаа акциите по силниот земјотрес. Властите соопштија дека шансите да се најдат преживеани се многу мали. Владата прогласи ден на жалост по катастрофата.

Стравувајќи од дополнителни потреси, многу луѓе во регионот меѓу Иран и Ирак, кој беше погоден од силен земјотрес, ноќта ја поминаа на отворено, без оглед на студот. Иранскaтa хуманитарна организација Црвена полумесечина соопшти дека биле подигнати бројни шатори за привремено сместување, но прекинот на снабдувањето со електрична енергија, недостигот од вода и затрупаните собраќајници ги отежнуваат напорите да му се помогне на населението. 

„Потребна ни е помош. Имаме потреба од речиси сѐ, властите треба што поскоро да помогнат“ вели една жителка од градот Сарпол е-Захаб, кој е посебно тешко погоден. На луѓето првенствено им се неопходни шатори, вода и храна, изјави шефот на иранската Револуционерна гарда, генералот Мохамед Али Џафари, кој го посети подрачјето погодено од потресот. Новоизградените куќи го издржале релативно добро земјотресот, но постарите, изградени од глина, се целосно уништени, изјави тој за државната телевизија. Според извештај на новинската агенција Ирна, во загрозените области се испратени 30 тимови на Црвената полумесечина, а денеска нив  ги посети и иранскиот претседател Хасан Рохани, кој вети брза обнова. Иранската влада денешниот ден го прогласи за ден на државна жалост, изразувајќи им сочувство на роднините на жртвите, а на повредените посакувајќи им побрзо закрепнување.

Бројот на загинатите, како што соопштуваат властите, се искачил на преку 420, а повредени се преку 7300 луѓе. На ирачката страна на границата, според податоците од Министерството за здравство, загинале осум лица, а околу 330 претпреле повреди. Земјотресот со сила од 7,3 степени се случи во неделата вечерта по локално време, кога најголем дел од луѓето биле во своите куќи, посебно погоден е јужниот дел од курдскиот регион. Епицентарот на потресот бил на околу 50 километри северно од Сарпол е-Захаб, на длабочина од 34 километри, во западната иранска провинција Керманшах, а по главниот удар се почувствувани уште серија од преку 150 дополнителни потреси.

Земјотреси кои го потресоа светот

Централна Италија во рушевини

Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.

Земјотреси кои го потресоа светот

Лабрадорот Лео

Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.

Земјотреси кои го потресоа светот

Танзанија

Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.

Земјотреси кои го потресоа светот

Вежби за децата во Јапонија

Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.

Земјотреси кои го потресоа светот

Потрага по најблиските (Беичуан, Кина)

Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.

Земјотреси кои го потресоа светот

Катастрофата во Хаити

На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.

Земјотреси кои го потресоа светот

Земјотресот во Суматра

На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.

Земјотреси кои го потресоа светот

Музафарабад, Кашмир

Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.

Земјотреси кои го потресоа светот

Л' Аквила- земјотрес и одговорност

Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.


Следете нѐ