И официјално потврдено: Груевски е во Унгарија!

Македонското МВР побарало и добило потврда од унгарското МВР дека Никола Груевски е во Унгарија и дека побарал азил, дознава Дојче веле. По ваквата потврда се очекува МВР да распише меѓународна потерница за Никола Груевски.

Според аналитичари со кои разговараше ДВ, од земја членка ЕУ како што е Унгарија се очекува да не заштитува и не станува засолниште на лица осудени за криминал, кои направиле штета на граѓаните на Македонија. Во тој контекст се очекува македонските надлежни органи да им предочат на унгарските власти и дека врз Груевски немало никакви закани за живот, како што тој објави на Фејсбук, напротив - дека имал редовно шестчлено обезбедување од припадници на МВР и досега немал никакви закани за неговата безбедност.

Дознаваме дека полициското обезбедување последен пат му било на услуга вечерта на 8-ми ноември. Утрото на 9-ти ноември тој лично ги известил дека нема да има потреба од нив, со цел во текот на денот да се стават на располагање за други работни обврски во полицијата. Тој датум се смета и за ден кога ја напуштил државата, најверојатно преку нелегален премин и со добро организирана логистика од Македонија преку соседна Србија до Унгарија.

Повеќе:

-Како Груевски стигна до прегратката на Орбан?

Извори од власта најенергично ги демантираат шпекулациите дека можеби станува збор за наводен политички договор со Груевски. Најавуваат дека ќе ги преземат сите мерки за Груевски да биде вратен во Македонија на издржување на затворската казна, и дека за таа цел ќе ги алармираат сите европски институции. 

„Бегството на Груевски е доказ дека тој ги признава криминалите и злоделата врз граѓаните и државата. Ова е доказ дека тој и неговите соработници ја носат најголемата одговорност за состојбата во која се наоѓа Република Македонија“, велат извори од власта, додавајќи дека „Груевски со овој чин паднал на најниско можно ниво и не собрал храброст да се соочи со казната за сопствените злодела“.