Каталонија: Пуџдемон игра на време

Каталонскиот лидер Карлес Пуџдемон денеска наведе дека сака мандатот за прогласување независност кој го доби од Каталонците, да го „суспендира“ на 2 месеца за да се започне дијалог со Мадрид. „Во наредните два месеца наша главна цел е да преговараме“, наведе Пуџдемон во писмото до премиерот на Шпанија, Маријано Рахој, откако повтори дека го „суспендира мандатот“ за прогласување независност на Каталонија. Пуџдемон побара и „што е можно најбрзо“ да се сретне со Рахој. Тој го повика Рахој да ја „отфрли репресијата“ и да го прифати „состанокот што е можно побрзо“.

Пуџдемон така одговори на барањето на владата во Мадрид јасно да каже дали во минатата недела прогласи независност на тој шпански автономен регион. Поставениот рок за одговор истече денеска во 10 часот.

Министерот за надворешни работи на Шпанија, Алфонсо Дастис, рече оти денеска каталонскиот лидер во писмото до премиерот Маријано Рахој не го изнел „бараниот јасен став“ за прогласувањето на независност на Каталонија. „Јасно е дека господинот Пуџдемон не одговори, не го даде бараното појаснување“, рече Дастис.

Нов рок до четврток

Ова беше првата реакција на официјален Мадрид на писмото од Пуџдемон. Дастис наведе оти тоа писмо „не претставува одговор на формалното барање“ на шпанската влада да се разјасни дали е или не е прогласена независност на Каталонија. „Мислам дека радикалните влијанија преовладаа“, рече Дастис во Луксембург, каде што се наоѓа на состанокот на министри за надворешни работи на ЕУ.

Како незадоволителен одговорот на Пуџдемон го оцени и шпанскиот министер за правда Рафаел Катала. Шпанската централна влада сега ја повикува каталонската регионална влада до четврток да се изјасни дека не прогласила независност.  Ова во Мадрид пак го изјави заменик-премиерката на Шпанија Сораја Саенц Сантамариа. Секој дијалог, според неа, мора да се одвива во рамките на законите. Ставот на централната влада, покрај тоа е поддржан од голем дел од шпанскиот парламент, додаде политичарката.