Кесонг останува затворена

Јужна и Северна Кореја повторно ги одложија разговорите за повторно отворање на индустриската зона Кесонг. И на третата рунда преговори овој месец не е постигната согласност, соопшти главниот јужнокорејски преговарач Ким Ки Вонг по средбата. Портпарол на Министерството за обединување во Сеул соопшти дека имало разлики. Северна Кореја не се согласила со барањето на Јужна Кореја во иднина да биде неможно еднострано затворање на зоната. Сепак, Пјонгјанг потврдил дека економската зона треба да биде отворена повторно што е можно побргу.

За среда (17.07) се закажани нови разговори. Индустриската зона се наоѓа на севернокорејска територија, на околу 10 километри оддалеченост од границата меѓу двете држави. Пјонгјанг ги повлече своите работници од Кесонг во април поради заедничките воени маневри на јужнокорјеските и американските воени сили. Претходно, тензиите во регионот беа зголемени поради третиот севернокорејски атомски тест, извршен во февруари годинава.