1. Прескокни до содржината
  2. Прескокни до главната навигација
  3. Кон други страници на DW

Ковид: Австралија ги отвора границите за вакцинирани туристи

ЖА / агенции
7 февруари 2022

Омикрон, туристичката индустрија и натегањата околу тениската ѕвезда Новак Ѓоковиќ ја разнишаа строгата ковид политика во Канбера. Владата најави дека наскоро ќе им посака добредојде на вакцинираните туристи.

https://p.dw.com/p/46d5m
Australien | Blick auf die Skyline von Sydney
Фотографија: Dirk Rueter/Zoonar/imago images

Австралија планира на 21 февруари повторно да ги отвори своите граници за влез на патници од странство, под услов да се комплетно вакцинирани. „Ако имате примено две дози вакцина, ќе се радуваме повторно да ви посакаме добредојде во  Австралија“,  изјави премиерот Скот Морисон на прес конференција во Канбера, обраќајќи им се на туристите.

Министерката за внатрешни работи дополни: посетителите, кои можат да докажат медицински оправдана причина за невакцинирање против коронавирус, ќе бидат примени според правилото за исклучок. Меѓутоа, различните австралиски сојузни држави и територии имаат различни правила, на пример во поглед на плафонот за доаѓања на странци, истакна Морисон.

Австралија во март 2020. година ги затвори своите државни граници за странци, па дури и за најголем дел од своите државјани во странство и долго следеше политика на нулта толеранција на коронавирус. Но, под притисок на брзото ширење на исклучително заразната варијанта Омикрон, Морисон мораше да се откаже од ваквата крајно рестриктивна политика.

Австралиската туристичка бранша постојано интервенираше кај владата за повторна дозвола за влез на туристи. Летото на јужната хемисфера се наоѓа во последниот месец. Освен тоа, спорот околу дозволата за влез на невакцинираниот српски тениски ас  Новак Ѓоковиќ  ја заостри дебатата околу строгите правила.

Австралија чекор по чекор ги олабавува правилата за одредени граѓани, за долготраен престој и за студенти. Со најновата најава би биле укинати речиси сите преостанати ограничувања.