230610 McChrystal USA Obama

Американскиот претседател Барак Обама за првпат јавно се изјасни во врска со случајот Меккристал по вчерашната седница на неговиот кабинет. Притоа, Обама не се впушти во ништо повеќе, освен во една критичка забелешка на сметка на генералот. „Генералот Меккристал е на пат за Вашингтон, ќе се сретнам со него, истото ќе го стори и министерот за одбрана Роберт Гејтс. Мислам дека е јасно оти статијата во која се спомнува генералот и неговиот тим покажува слаба способност за проценка на ситуацијата. Но, сакам прво да разговарам со него лично, пред да ја донесам конечната одлука.“

Сите опции отворени

Според оваа изјава на Обама, судбината на генералот Меккристал се чини дека уште не е запечатена. Во таа насока оди и изјавата на портпаролот на Белата куќа, Роберт Гибс:

„Би рекол дека сите опции се отворени...“

Гибс им раскажа на новинарите дека претседателот Обама бил многу лут кога слушнал за статијата во магазинот „Ролинг стоун“. Во неа генералот Меккристал и неговите соработници со понижувачки тон зборуваат за најблиски соработници на претседателот Обама, меѓу кои се и потпретседателот Џо Бајден, советникот на претседателот за безбедносни прашања, американскиот амбасадор во Авганистан и други.

Барања за смена

Меккристал, во меѓувреме, се извини за дадените изјави, но и покрај тоа бројот гласови во политички Вашингтон, кои бараат смена на генералот е постојано во пораст. Така Пол Бегала, кој му беше советник на Бил Клинтон додека ја вршеше функцијата претседател на САД, за ТВ-станицата СиЕнЕн порача:

„Тоа не може да се остави неказнето, некој така да зборува, а потоа и понатаму да смее да командува со силите кои треба да му бидат лојални на главниот командант, претседателот на САД, тоа не е дозволиво. Според мене, станува збор за откажување на послушност од страна на генералот и тој треба да биде веднаш отпуштен. Не би смеело дури ни да му се дозволи да ја има честа сам да поднесе оставка“, категоричен е советникот Пол Бегала.

Не му е првпат

И тој, како и други американски експерти, потсетуваат дека Меккристал и порано си дозволил негативно да зборува за потпреседателот Бајден и бараат сега да му се стави крај на таквиот тренд. Франсис Таусенд, поранешна советничка на претседателот Џорџ Буш, гледа само еден начин како Меккристал би можел да остане на функцијата главен команадант на американските сили во Авганистан.

„Главна цел на Меккристал мора да биде да го увери претседателот Обама и Белата куќа дека ќе биде покорен, нема веќе да дава изјави и дека ќе си ја заврши задачата што му ја дал претседателот и тоа во зацртаниот рок.“

Покорна работа и молк

Задачата за која станува збор е разбивањето на структурите на Ал Каеда и на Талибанците, со што треба да се отвори патот за повлекување на американските војници од Авганистан, почнувајќи од средината на наредната година. Обама, пак, порача дека при донесувањето на одлуката за спорниот генерал ќе води сметка и за положбата на американските војници кои се стационирани во Авганистан.

„Таму имаме млади мажи и жени, кои многу се жртвуваат. Одлуката што ќе ја донесам во врска со генералот Меккристал ќе зависи потполно од стратегијата што ги оправдува огромните жртви на овие млади луѓе!“

Автор: Албрехт Циглер / Горан Чутаноски

Редактор: Елизабета Милошевска Фиданоска