Луѓе 2015

На 96-годишна возраст сепак почина. Хелмут Шмит се чинеше бесмртен, беше институција, важеше за најомилен канцелар. Тој на Германците им го објаснуваше светот, а на светот му ја објаснуваше Германија. Беше државник со голем авторитет. Почина на 10 ноември, во својот роден Хамбург. Сочувството беше големо.

Дали откако ќе ѝ заврши мандатот ќе биде омилена како Хелмут Шмит? Во секој случај годинава рејтингот на Ангела Меркел падна. Многу Германци се незадоволни од нејзината бегалска политика. Меѓународно, меѓутоа, нејзиниот прием на бегалците ѝ донесе голема почит. Магазинот „Тајм“ ја прогласи за „Личност на годината“.

Уште пред да се зголеми драстично бројот на бегалците, Меркел предизвика реакции кога погали едно девојче со палестинско потекло, обидувајќи се да го утеши. Рим Савил ѝ раскажа за своите грижи, за стравот од протерување. „Политиката е понекогаш тешка“, одговори Меркел, а Рим почна да плаче. Девојчето подоцна изјави дека Меркел барем ја ислушала.

При бегството од војна, страдање и сиромаштија годинава умреа илјадници луѓе. Мажи, жени и деца... Ајлан Курди имаше три години кога се удави на патот за Европа, на почетокот на септември. Сликата на сириското детенце предизвика згрозеност ширум светот. Но, и четврт година потоа секоја недела пред брегот на Европа се дават бегалци.

Стефан Шарбоние, наречен Шарб, издавач и шеф илустратор, лицето на „Шарли Ебдо“. Овде демонстрантите во Париз се собрани во знак на сеќавање на Шарб и неговите убиени колеги. Исламистичките терористи убија вкупно 17 луѓе при нападот на редакцијата на сатиричниот магазин и на еден еврејски супермаркет на средината од јанаури 2015.

Само 10 месеци по нападите од јануари, Париз повторно беше цел на исламисти и притоа загинаа 130 луѓе. Човекот на носилка ги преживеа терористичките напади врз стадион, ресторани и една концертна хала. На комеморацијата претседателот Оланд им вети на семејствата на загинатите и на преживеаните дека ќе стори сѐ за „уништување“ на одговорните за нападите.

И притоа мисли на овој човек: Абу Бакр ал-Багдади, од 2014. самонаречен Калиф на „Исламска држава“. Тој го зацврстува своето царство на стравот со обезглавувања и киднапирања. Притоа, теророт постојано го образлага со теолошки причини. Постојано во оптек се гласини за неговата смрт, но досега тие не се потврдени.

Споредбата со кум е негова. Тој себеси се гледа како поттикнувач на фудбалот. Но, цел свет мораше да прави споредби со шефот на мафијата на Франсис Форд Копола - па, Блатер е обвинет за корупција во голем стил. Прво, во јуни беше реизбран на функцијата претседател на ФИФА, потоа најави своја оставка, за на крајот, во октомври, да биде суспендиран од страна на Комисијата за етика на ФИФА.

Ниту еден британски монарх не ја носел круната толку долго: Елизабета Втора е кралица речиси 64 години. Кога седна на тронот премиер беше Винстон Черчил. Еднаш неделно Елизабета Втора за него имаше термин за аудиенција, а оттогаш уште и за 11 негови наследници. Во 2015 година, покрај рекордот на тронот, таа се израдува и своето петто правнуче: принцезата Шарлот од Кембриџ.

На средината на 80-тите години на минатиот век беше воен диктатор, а сега сака да ја реформира Нигерија како демократ. Мухамаду Бухари е претседател на најнаселената земја во Африка од мај годинава. Новиот сака да се бори против корупцијата во државата богата со нафта и да ја победи терористичката организација Боко Харам. Очекувањата се големи, но од ветениот пресврт досега е малку нешто видливо.

Доминира во насловите и во анкетите. Дали расистот и непријател на исламот ќе стане кандидат на републиканците, а потоа и најмоќен човек на светот? Тоа во Европа никој не може да си го замисли. А, сепак и овде има фасцинираност од милијардерот со исфенирана фризура. Откако се кандидираше, на Гугл неговото име се пребарува четири пати повеќе отколку „Хилари Клинтон“. Во 2016. ќе знаеме повеќе.