Меркел не отстапува од длабоки реформи во ЕУ

Шефовите на пратеничките клубови на Европскиот парламент имаа можност да видат конкретна, сериозна канцеларка која го изнесува своето гледање на европската криза и укажува на патиштата за решавање на проблемите во ЕУ. Меркел настапи како убедена Европејка, но и како партнерка на парламентот.

„Слободата која Европејците ја стекнаа со падот на ѕидот сега треба да ги поттикне на нужни промени“, порача Меркел.

Кога вели дека е крајно време за промени, Меркел не смета само на консолидацијата на државните буџети, туку и на повеќе дисциплина и контрола, за да не дојде повторно до висока задолженост. Притоа, Европејците не би требало да стравуваат од долгорочни промени на договорите.

„Мора да најдеме вистински пат за долгорочно да ги стабилизираме стопанската и монетарната унија, на тој начин што ќе ги отстраниме грешките од периодот на основањето на Унијата“, рече германската канцеларка.

Критики за политиката на штедење

Дел од шефовите на пратеничките клубови ја критикуваа политиката за штедење во земјите погодени од кризата како Грција, Португалија и Шпанија. Претседавачот на пратеничката група на Социјалистите Ханес Свобода бараше да се стави крај на „неуспешниот експеримент на политика на штедење“ и да се премине на политика на стопански раст. Слично мислење изнесе и Ребека Хармс од партијата на Зелените. Шефот на Либералите Ги Ферхофштат се заложи за заеднички европски обврзници.

„Еврото може да исчезне доколку не формираме европска држава, вистинска европска влада, европска демократија со вистински буџет и сопствени обврзници“, рече Ферхофштат .

Но, тие обврзници Меркел ги одбива затоа што, според неа, ниските камати го намалуваат притисокот врз дисциплината која е неопходна за консолидација.

„Доколку ги затвораме очите пред реалностa, нема да постигнеме благосостојба“, заклучи германската канцеларка во Брисел.