Мировен марш во Скопје

Учесниците на протестот маршираа под мотото “Кажи НЕ на оружјето“. Сопственикот на интернет кафето во кое беа убиени трите Албанчиња, вели:“Наместо нашите деца да работат со пенкало, тие треба да земат оружје да се бранат. Не сме слободни да ги пуштиме на училиште. Не се враќаат. Наместо да седат пред компјутер, да го развиваат мозокот, тие се фрлени во контејнер. Тоа така не оди.“

Со роднините и пријателите на убиените деца, денеска маршираа градоначалникот на општина Чаир, Изет Меџити и министерот за образование, Азис Положани. Меџити ја повика полицијата да го реши случајот и да ја засили безбедноста во Чаир:

“Со овој протест сакаме уште еднаш да придонесеме за случајот да биде расчистен и криминалците да бидат осудени. Само на тој начин ќе придонесеме за граѓаните не само во Чаир туку и во цела Македонија да бидат побезбедни.“

Протестната поворка од паркот во Чаир се упати по улицата “Цветан Димов“, до Бит пазар, па преку Старата скопска чаршија се собра на платото пред стоковната куќа “Илинден“. Министерот Положани, од позиција на граѓанин, ги повика институциите да ги спречат трагичните настани во иднина:

“Јас сум тука како граѓанин, за да го осудам овој криминален чин врз децата. Освен тоа што бараме институциите да реагираат поефективно во вакви ситуации, сигурно ќе биде потребна и граѓанска осуда на ваквите појави и вклученост на сите фактори што може да помогнат за вакви немили настани да не се случуваат.“

Артан Груби од градското движење “Разбуди се“, инаку оорганизатор на протестот, кажа: “Се надеваме дека со ова ќе ги разбудиме граѓаните на Скопје од кошмарот во кој што се наоѓаат и да нема веќе вакви случувања, еднаш засекогаш. Сочувство до семејствата и до сите други семејства. Од крајот на конфликтот во 2001-ва, во Скопје има 250 невини жртви, Затоа да прекинеме со ова. Ве молам – да се разбудиме.“