НАТО конечно командува со операцијата во Либија

Во воената офанзива во Либија нема да учествуваат германски војници, владата во Берлин ова постојано го нагласува, меѓутоа Германија гласаше, НАТО да ја преземе командата во Либија. „НАТО членките донесоа одлука, заеднички да ја преземат воената операција во Либија“, рече генералниот секретар на НАТО Андерс Фог Расмусен. Меѓународната коалиција под водство на Американците, Французите и Британците, која ја започна воената интервениција, целосно ќе ја предаде командата.

Од минатиот вторник НАТО застана на чело на поморската блокада, со која треба да се спречи испорака на оружје и прилив на нови странски платеници преку Средоземното Море. Во петокот НАТО најави дека има намера да командува со воената операција за забранета зона на летови. Сега Алијансата го презема и последниот дел од воената акција: „Наша цел е да ги заштитиме цивилите и областите населени со цивили, на кои им се закануваат напади од режимот на Гадафи “, рече Расмусен.

Ова подразбира воздушни напади, кои не се насочени само против либиското воздухопловство и противвозушна одбрана, туку и против либиските трупи, оклопни возила и останати воени возила, кои се обидуваат да ги нападнат цивилите. Поради ваквите воздушни напади, противниците на Гадафи, кои претрпеа загуби, повторно тргнаа во офанзива. Воената алијанса се повикува на членот 4 на резолуцијата на ОН за Либија, кој предвидува употреба на сите неопходни средства за заштита на населението, исклучок е употреба на копнени трупи. „НАТО ќе ги спроведе аспектите на резолуцијата на ОН, ништо повеќе и ништо помалку“, увери Расмусен.

За натамошните чекори во Либија, утре во Лондон треба да биде одржана конференција на која е најавено учество на шефовите на ОН, НАТО и Африканската унија како и преку 30 министри за надворешни работи.

Автор: Андреас Ројтер/ Александра Трајковска

Редактор: Симе Недевски