На Далечниот исток за поблиски односи
12 ноември 2009За турнејата на Барак Обама во Азија, заменикот-советник за национална безбедност Бен Роудс вели: „Една од главните пораки на претседателот Обама е дека САД имаат намера во тој регион да ја преземат главната улога за низа теми.“
Џефри Бејдер, кој е член на Националниот совет за безбедност надлежен за источна Азија, додава: „Општ впечаток во регионот е дека американското влијание во последните години опадна, додека кинеското зајакна.“
Причината за тоа, според Бејдер, е зафатеноста на САД со другите светски трусни подрачја: „Додека Азија добиваше на значење, САД на разни фронтови беа зафатени со војната против тероризмот.“
Затоа, администрацијата на Обама има намера во Азија да ги зајакне старите и да создаде нови сојузништва, водејќи притоа сметка и за тамошните чувствителности. Бејдер вели: „Народите во сојузничките земји во Азија го поддржуваат партнерството, но сакаат да се слушне и уважи и нивниот збор и на нивните територии да има помалку американски војници. Затоа ќе го реорганизираме присуството во Јужна Кореја и Јапонија.“
Економијата во прв план
Бејдер прецизира дека тоа не значи и целосно воено повлекување од тие две земји.
САД се заинтересирани не само за добри политички, туку и за економски односи, бидејќи повеќе не сакаат таму само да купуваат, туку и да продаваат, вели советникот за економски прашања Мајкл Фроман.
„Претседателот е заинтересиран за избалансиран стопански раст на земјите од тој регион, и да ги отворат своите пазари за да можеме таму да извезуваме и да отвориме нови работни места во САД“, вели Фроман.
Се планира и унапредување на односите со Кина која има голема улога во решавањето на глобалните проблеми - економската криза и заштитата на климата, како и во судирите во Авганистан, Пакистан, со Иран и Северна Кореја.
Автор: Кристина Бергман / Борис Георгиевски
Редактор: Елизабета Милошевска Фиданоска