Новата влада на Заев: Преценети кадри или потценети реформи?

Најмногу реакции околу составот на Владата предизвикаа предлозите на ДУИ - бивши градоначалници и министри, без учинок за пофалба. Алијансата за Албанците одлуките ги носи вечерва, а „Беса“ веќе реши - оди во опозиција.

Финализирани се предлог-составот и програмата на новата коалициска влада на СДСМ, ДУИ и Алијансата на Албанците. Идната влада ќе остане со поддршка од 62 пратеника, откако Движењето „Беса“ одлучи да не учествува во владата, но најави дека ќе ги поддржи реформските чекори коишто ќе бидат од заеднички интерес за сите граѓани.   
Централниот одбор на СДСМ на вечерашната седница ги поддржа предложените кандидати за новата реформска влада. Во тимот на социјалдемократите нема големи изненадувања, бидејќи се потврдија досегашните шпекулации со спомнуваните кадровски адути: Радмила Шеќеринска е предложена за министерка за одбрана, Никола Димитров за надворешни работи, Оливер Спасовски за внатрешни работи, Драган Тевдовски за финансии, Рената Тренеска -Дескоска за образование, Љупчо Николовски за земјоделство, Мила Царовска за труд и социјална политика, Роберт Алаѓозовски за култура, Дамјан Манчевски за информатичко општество и администрација, Горан Сугарески за транспорт и врски. Министри без ресор се Кочо Аѓушев, Роберт Поповски, Едмонд Адеми, Аднан Ќахил, Самка Ибраимовски, Зорица Апостоловска и Зоран Шапуриќ. При поделбата на колачот ресорите здравство и локална самоуправа се „чуваат“ за Алијансата за Албанците, која вечерва треба да потврди дали ќе учествува во владата и да ги утврди кадровските предлози за тие ресори.   

Реакции за кадрите на ДУИ
ДУИ нејзините кадровски адути ги соопшти уште синоќа и предизвика бројни реакции во јавноста, со забелешка дека ниту понудила нови, ниту кадри со реформски капцитет. Меѓу предложените кадри на ДУИ има тројца поранешни градоначалници и двајца поранешни министри. Но, претседателот на партијата смета дека е направен вистинскиот избор со предлогот вицепремиер за политички да биде Хазби Лика, вицепремиер за евроинтеграции Бујар Османи, за животна средина Садула Дураку, за економија Крешник Бектеши, министер без ресор Рамиз Мерко и министер за правда, Булент Салиху. Лидерот на ДУИ, Али Ахмети, рече дека „Владата ќе има тежок мандат од четири години, но со добар крај“. Тој смета дека предложените имиња се соодветни за реализирање на ветените реформи, особено реформите во секторот правда.

Now live
06:29 минути
Теми | 25.05.2017

Заев за ДВ: Кадровските решенија до петок, новата влада на...


„Сигурно дека за јавноста и медиумите не е познат, но Булент Салиху пет години е директор на Инспекторатот за шумарство, така што многу има врска со законски прашања, законот, Уставот и така натаму“, рече Ахмети.
Ваквата аргументација наиде на многу критики на социјалните мрежи, исто како и најавите дека Ахмети, наводно, ги чувал искусните кадри за локалните избори. Претседателот на Движењето, Биљал Касами, рече дека не донеле одлука дали ќе гласаат за новиот владин состав, но шансите се мали.
„ Како што тргнале со вакви предлози од ДУИ, а не знам какви ќе бидат другите - тешко!“, рече тој. 

„Беса“ - конструктивна опозиција
Предлог-составот на владата се комплетира вечерва, откако попладнето социјалдемократите соопштија дека не постигнале договор со „Беса“.
„Оставаме отворени врати за соработка околу поддршка на реформите што престојат во Република Македонија, како и за се друго од заеднички интерес за сите граѓани на нашата земја“, соопшти СДСМ. 


Од „Беса“ ја информираа јавноста дека таа нема да биде дел од новата влада, „бидејќи мандаторот на идната влада не бил подготвен да ги прифати принципите за заедничко владеење и да потпише заеднички договор“. Дел од принципите за кои се залагало Движењето не биле прифатливи за СДСМ, особено барањето за „редефинирање на државата“, иако јавноста и не беше детално информирана што подразбира „Беса“ под тоа.
„Редефинирање, подразбира на сите закони и други нормативни акти, за кои не се потребни 2/3 мнозинство во Собранието, а да се покаже подготвеност за јавна дебата и за прашања кои се опфатени со редефинирање, а се однесуваат на редеферинирање на уставно-правниот систем“, вели за ДВ портпаролот на „Беса“, Фатон Фазлиу.  
Според него, ако СДСМ го има „Планот за живот“, а ДУИ - Рамковниот договор, очекувано е и „Беса“ да се залага нејзините клучни принципи да станат основа за соработка во владата, но, тие не биле прифатени. 
„Како и да е, 'Беса' ќе продолжи да биде конструктивен политички фактор во Македонија, останувајќи заштитник на албанските, но и на севкупните граѓански интереси во државата. Притоа ја информираме јавноста дека без оглед на тоа што 'Беса' останува опозициска партија, таа ќе ја поддржи секоја иницијатива што ќе биде во полза на Албанците и државата, а во насока на имплементација на потребните реформи и нашите врати ќе бидат секогаш отворени за секој кој тежнее кон тие принципи“, рече Касами.
Ахмети и Заев на денешната попладневна средба се договориле програмата и предлог-составот за новата влада во најбрз рок да се достават до Собранието, а утре да се иницираат и промени во Изборниот Законик. 

Како функционира Собранието?

Законодавна власт

Носител на законодавната власт во Македонија е Собранието. Пратениците кои го сочинуваат се избираат на општи и непосредни парламентарни избори и нивниот број може да биде од 120 до 140, но од првите избори досега, нивниот број е 120. Пратениците во Собранието се избираат со мандат од 4 години. Предвремено распуштање пред истекот на мандатот е можно доколку мнозинството пратеници гласаат за тоа.

Како функционира Собранието?

Постојано заседание

Собранието е во постојано заседание и по конституирањето на пратеничкиот состав претседателот само ги известува пратениците за терминот и дневниот ред на седниците. Пратениците ја извршуваат својата функција преку учеството во пленарните седници и седниците на собраниските тела. Собраниските комисии немаат право да донесуваат одлуки, туку само да даваат мислења и предлози.

Како функционира Собранието?

Надлежности

Надлежностите на Собранието и основните правила за неговото функционирање, се дадени во Уставот. Затоа тоа што не постои Закон за Собрание, деталите околу постапката за неговата работа и неговите тела се регулирани со Деловникот за работа на Собранието.

Како функционира Собранието?

Како се носат законите?

Една од главните задачи на Собранието е носењето на закони. Законите ги претставуваат правилата во општеството и со нив на граѓаните им се гарантира некое право, им се забранува некое поведение, или им се наредува да постапуваат на одреден начин. Во зависност од видот на законите, тие можат да се донесат со просто, апсолутно, двотретинско (квалификувано) или двојно мнозинство.

Mazedonien Parlament NO FLASH (Petr Stojanovski)

Како функционира Собранието?

Просто мнозинство

За законите кои се донесуваат со просто мнозинство потребно е позитивно да се изјаснат мнозинството од присутните пратеници во Собранието, но најмалку една третина од вкупниот број на пратеници, односно најмалку 41.

Како функционира Собранието?

Апсолутно мнозинство

За да се донесе закон за кој е потребно апсолутно мнозинство, потребна е поддршка од страна на мнозинството од вкупниот број на пратеници во Собранието, односно најмалку 61 пратеници.

Како функционира Собранието?

Двотретинско (квалификувано) мнозинство

Двотретинско или квалификувано значи дека за одреден закон е потребно позитивно да се изјаснат две третини од вкупниот број пратеници во Собранието. Ова значи дека законот е донесен кога за неговото донесување гласале 80 пратеници.

Како функционира Собранието?

Двојно мнозинство

Двојно мнозинство е потребно за законите што се однесуваат на правата на заедниците (употреба на јазици, лични документи, употреба на симболи и сл.), Собранието одлучува со мнозинство гласови, при што е потребно да се изјасни и мнозинството од пратениците што припаѓаат на заедниците што не се мнозинство во Република Македонија, т.н. Бадентерово мнозинство.

Како функционира Собранието?

Дефинирани со Уставот

Во Уставот на Република Македонија се точно прецизирани законите за кои се бара двотретинско мнозинство. Тоа се: Законот за грб, знаме и химна; Законот за организација на органите на државната управа; Законот за судови; Законот за локална самоуправа; Законот за одбрана и законите за судски постапки.

Поврзана содржина

Северна Македонија | 14.06.2019

Психодрамата на Заев!

Следете нѐ