Објектот на А1 под полициска блокада

Тензична атмосфера на раб на ескалација предизвика полициската блокада на објектот во кој се наоѓа телевизијата А1. Полициски тимови вчера вечер (25.11.10) ги блокираа влезовите на Националната телевизија, новинарите тврдат дека е извршен упад во медиумот, МВР пак дека станувало збор за асистенција на финансиската полиција, која од вчера претпладнето е во контрола на дел од фирмите на сопственикот на А1 Велија Рамковски.

Чадиковски: силен притисок врз новинарите и А1 телевизија

Уредниците револтирани што полицијата го попречила влезот на новинарите во сопствената редакција и вршела нивно легитимирање. Дел од нив се пожалија и на полициска бруталност: „Ова го толкувам како еден силен притисок врз нас новинарите и врз А1 телевизија која што е единствен телевизиски демократски столб во моментов. Сакаме да знаеме што се случува и зошто ни е попречено слободното движење. За оваа ситуација ќе ги информираме меѓународните институции, ова вака не може да остане, а во исто време ја повикуваме цела демократска јавност да застане зад нас бидејќи во вакви услови неможе да се работи“, изјави Младен Чадиковски, главен и одговорен уредник на телевизијата.

МВР тврди дека станува збор за полициска асистенција побарана од инспекторите на УЈП

Од МВР тврдат дека во А1 не бил извршен упад ниту притисок туку само асистенција на инспекторите кои со судска наредба ја чешлале финансиската документација на фирмите кои биле на иста адреса со А1, но не и на самата телевизија: „Во моето јавување во А1 се обидов да им објаснам дека не станува збор за контрола на телевизијата туку напротив за контрола на други фирми кои немаат допирни точки со медиуми. Истото тоа соопштение МВР го објави до сите медиуми можеби еден час претходно, но тоа ниту беше објавено на А1 ниту покажаа интерес за тоа“, изјави портпаролот на МВР Иво Котевски.

Од УЈП се сомневаат дека преку дел од фирмите на Рамковски биле одлеани милионски суми во странство: „Се сомневаме за неосновано одлевање на капитал во странство од овие фирми во износ од цирка седум ипол милиони евра. Тоа е нашето сознание. Преку контрола на други деловни субјекти и деловните односи меѓу тие фирми дали е тоа вистина или не треба да го овозможи токму оваа контрола“, изјави првиот човек на Управата за јавни приходи Горан Трајковски доцна синоќа за телевизијата Канал 5.

Полициската интервенција испровоцира жестоки реакции на политичари од опозицијата, новинари, експерти и претставници на невладиниот сектор кои ја обвинија власта за брутален атак врз слободата на говорот и демократијата во Македонија.

Автор: Костадин Делимитов

Редактор: Александра Трајковска