Одлуката е донесена-„Македонско претседателство 2010“

Стилизираното македонско знаме со логото на Советот на Европа, проследено со текстот на англиски јазик „Македонско претседателство 2010“, е официјалното лого на македонското претседателство со Комитетот на министрите на Советот на Европа. Тоа е придружено од својата десна страна со официјалното лого на Комитетот на Министрите на Советот на Европа. Дополнително документот носи и соодветна ознака, својствена на сите службени документи на Комитетот на министрите - CM/Inf (2010) 19. Логото беше официјално промовирано вчера на состанокот на Комитетот на министрите на Советот на Европа, кој заседаваше на амбасадорско ниво во Стразбур.

Ова лого се наоѓа на документот доставен од Министерството за надворешни работи на Република Македонија за приоритетите на македонското претседавање со Комитетот на министрите.

Секретаријатот на комитетот истиот документ им го дистрибуира на останатите 46 земји членки, во согласност со востановенатa практика во меѓународните организации од членството на Република Македонија во ООН до денес, со покривна страница на која се наоѓа референцата која се користи за привремено ословување на државата во согласност со Резолуцијата на Советот за Безбедност 817 од 1993, без никакви промени во содржината на документот, кој го содржи официјалното лого и именувањето на оваа функција во Советот на Европа како: „Македонско претседавање 2010“.

Состанок зад затворени врати

На состанокот кој по вообичаеното правило се одржува зад затворени врати, не се дискутирало и не е донесена одлука за тоа под кое име Република Македонија ќе претседава, бидејќи Советот на Европа не може да спречи земја-членка да ја користи придавката што ја сака. Со други зборови Комитетот на Министрите го прифати логото „Македонско претседателство 2010“.

Приоритетите на македонското претседавање со Комитетот на министрите, официјално ќе бидат претставени од страна на министерот за надворешни работи Антонио Милошоски на 120-та министерска сесија закажана на 11 мај во Стразбур.

Автор: Тони Гламчевски

Редактор: Жана Ацеска