По изборите во Зимбабве: ќе замине ли Мугабе по 28 години?

Од претставници на Владата и на опозицијата дојдоа деманти за какви и да е преговори за мирно преземање на власта.

„Нема никакви разговори“ – порача водачот на опозицијата Морган Цвангираи. Тој нагласи дека неговата партија нема да преговара за никаква спогодба се’ додека не бидат објавени официјалните резултати од изборите:

„МДЦ нема да прави никакви спогодби пред Изборната Комисија да ги објави резултатите. Тоа е правната позиција. Сакаме да знаеме кој победил на што пред да тврдиме нешто. Немаме право да тврдиме било што додека Комисијата не ги потврди резултатите. Иако ние знаеме на што сме победиле.„

Ваквиот релативно воздржан став на водачот на опозицијата Цвангираи е очигледен обид да не ја прегрее ионака напнатата атмосфера во Зимбабве.

Во меѓувреме американската влада побара од Изборната комисија во Хараре да ги објави резултатите од изборите на викендот. Народот очигледно се изјасни за промена, изјави портпаролот на американскиот Национален совет за безбедност Гордон Џондоу. Волјата на народот мора да се почитува.

И ЕУ побара од Роберт Мугабе да се повлече од власта. Во спротивно му се заканува државен удар, порача словенечкиот министер за надворешни работи Дмитри Рупел од име на претседавачот со ЕУ.