„Преспа“ помина во Скопје, на ред е Атина

Со 81 глас „за“ вечерва беа изгласaни амандманите за промена на Уставот. Со тоа од македонска страна нема пречка за имплементација на Договорот од Преспа. Сега следува негово гласање во грчкиот парламент.

Со 81 глас Собранието ги изгласа амандманите за промена на Уставот на Република Македонија. Покрај 72-та пратеника на владејачкото мнозинство, Беса на касами и Алијанса за Албанците, „за" гласаа и осумте независни опозициски пратеници и Панчо Минов од партијата ГРОМ, која е дел од опозициската коалиција. По ваквиот исход од гласањето, од македонска страна нема пречка за имплементација на Договорот од Преспа. Сега следува негово гласање во грчкиот парламент.  

Ваквиот епилог уследи по два дена „тргни-застани" и повеќе разговори со крилото на Беса предводено од Билал Касими, кое имаше свои барања, но со тоа и два спорни пратенички гласа кои го доведуваа во прашање неопходното двотретинско мнозинство. Денеска било договорено тие барања да не бидат дел од Уставот, но да бидат вградени во идни законски решенија. Во заедничкото соопштение на Владата и партијата Беса објавено непосредно пред почетокот на собраниската седница, се објаснува на кој начин се надминати разликите.

„Уште еднаш се потврдува дека државјанството е македонско/граѓанин на Република Северна Македонија. Притоа е прифатен амандман на Уставниот закон со кој се потврдува државјанството македонско/граѓанин на Република Северна Македонија и се појаснува како ќе гласи за граѓаните Албанци на албански јазик, и ќе се утврди во сите закони каде што е тоа потребно. Истовремено, се прифати амандманот на уставниот амандман 36, со кој се потврдува дека Републиката подеднакво води грижа за дијаспората на сите свои граѓани. Дополнително во законот за лична карта ќе се впише и етничката припадност на граѓаните", се вели во соопштението.

 Во него се наведува и дека сите други работи кои били предложени како амандмани ќе бидат повлечени, затоа што правно формално не е можно да се реализираат сега, а во идно време ќе се работи на нивно решавање.

Повеќе: 

ФАЦ: Ципрас ќе го истурка Договорот од Преспа пред евентуални предвремени избори

Заев: Верувам дека ќе има двотретинско мнозинство!

Канческа: ВМРО-ДПМНЕ ќе ги сфати своите грешки!

Посочените амандмани беа повлечени пред почетокот на собраниската седница, која започна без пратениците на ВМРО-ДПМНЕ, согласно со партиската одлука дека нема да дадат поддршка за промена на Уставот. За да нема „изненадувања" како на 19-ти октомври, кога осум пратеници на ВМРО-ДПМНЕ кренаа рака „за" отворање на процесот на уставни измени, лидерот Христијан Мицкоски во текот на денот закажа состанок на Извршниот комитет, на кој во партиското седиште биле повикани и пратениците на оваа партија.  

Канческа-Милевска: Жалам што ВМРО-ДПМНЕ го избра најлесниот и најгрешниот пат

Пратеничката Елизабета Канческа-Милевска, која со уште шест нејзини колеги беше исклучена од ВМРО-ДПМНЕ заради поддршка на процесот на уставни измени, вечерва од говорницата изрази жалење што нејзината партија не учествува во овој процес, туку решила да остане нем набљудувач, да се служи со лажен партиотизам, да ги  обинува другите за предавство и да чека некој друг да го реши ова прашање.

„Не се чувствуваме како предавници. Предавници се оние кои бегаат од реалноста и не ги решаваат проблемите. Жалам што ВМРО-ДПМНЕ го избра најлесниот и најгрешниот пат кон ова историско прашање за нашата држава. Убедена сум дека ВМРО-ДПМНЕ ќе ги сфати своите грешки", рече Канческа и поименично им се заблагодари на колегите од независната опозициска група за нивниот придонес за евроатлантската иднина на Македонија.

Теми

Паралелно со пленарната седница, пред парламентот граѓани трет ден протестираа против уставните измени, и јавно беа читани и исвиркани имињата на пратениците кои гласаа „за".

ВМРО-ДПМНЕ: Притисок 24 часа

Опозициската ВМРО-ДПМНЕ попладнето го помина во партиското седиште. Откако Кривичниот суд денеска го одобри обвинението на СЈО за предметот „Талир" во кој осомничени се поранешниот премиер Никола Груевски и негови сопартијци за незаконско финансирање на ВМРО-ДПМНЕ, опозициската партија обвини дека овој случај „нема врска со правото, туку со политиката на Заев за уцени и притисоци".

ВМРО-ДПМНЕ: Македонија станува окупирана држава од луѓе коишто се на власт и на сила го менуваат името

„Промената на името и договорот со Грција не поминаа на референдум, па сега се обидуваат на секој можен начин да дојдат до пратеник плус за да покажат некаков вештачки легитимитет на она што нема никаков легитимитет од народот - промена на името", рече на прес-конференција Генералниот секретар на ВМРО-ДПМНЕ, Игор Јанушев. Претходно и партискиот портпарол Наум Стоилковски обвини дека „насилното туркање на уставните измени во изминатите месеци, денес кулминира".

„Изминатите 24 часа власта врши жесток притисок врз пратеници, нивни роднини и пријатели за да ги поддржат уставните измени. Имаме неформални сведоштва од луѓе, чиј идентитет од разбирливи причини нема да го откриеме, за јавувања од посредници, кои што се повикуваат на Зоран Заев. Во игра се пари, ветувања за ослободување од политички прогон, за возврат за поддршка на уставните измени за промена на уставното име. Македонија станува окупирана држава од луѓе коишто се на власт и на сила го менуваат името!", реагираше ВМРО-ДПМНЕ.

СДСМ: Засекогаш ќе остане запаметено - Мицкоски, Груевски, Бачев и Иванов ја попречуваа иднината

СДСМ ги отфрли обвинувањата, со став дека „во најзначајните моменти за иднината на Република Македонија, Мицкоски шири лажни вести".

„Не е точно дека се врши притисок врз пратениците, ниту дека се под уцена. Сета оваа штета што ја прави Мицкоски, делувањето против ЕУ и НАТО интеграцијата, обидите да го закочи процесот, вклучително бегањето од дебата во Собранието и постојаното пласирање на лаги, е најголемото предавство на државните и националните интереси. Македонија ќе биде членка на НАТО и ЕУ. Засекогаш ќе остане запаметено: Мицкоски, Груевски, Бачев и Иванов ја попречуваа иднината, работеа против ЕУ и НАТО, но не успеаја", порачаа социјалдемократите.

Договор за решавање на спорот за името

Потпишување

Договорот за решавање на спорот за името во Псарадес, на грчката страна од Преспанското Езеро, го потпишаа министрите за надворешни работи Никола Димитров и Никос Коѕијас. „Горди сме затоа што избравме решение што нѐ обединува“, оцени македонскиот премиер Заев. Неговиот грчки колега Ципрас рече: „Овде сме да ги залечиме раните што ги остави времето, да отвориме пат за мир, братство и пораст“.

Договор за решавање на спорот за името

Роденден

Потпис на договорот стави и долгогодишниот посредник на Обединетите Нации во спорот за името, Метју Нимиц. Потпишувањето се падна токму на неговиот 79-ти роденден. „На членовите на моето семејството им реков дека не сакам подароци за овој роденден, зашто двајца премиери ќе ми дадат еден голем подарок“, рече Нимиц на церемонијата во Псарадес.

Договор за решавање на спорот за името

Вратоврска

Кога по потпишувањето на договорот требаше да се направи семејна фотографија од настанот, македонскиот премиер Зоран Заев, веројатно не сакајќи да се разликува од Алексис Ципрас, кој е познат по тоа што не носи вратоврски, ја извади својата црвена вратоврска и му ја подари на својот грчки колега. Тоа беше поздравено со широки насмевки и громогласен аплауз од присутните.

Договор за решавање на спорот за името

Договорот зачинет со македонска храна и вино

Официјалната средба по потпишувањето во Псарадес се префрли на македонскиот брег на Преспанското Езеро. Двете делегации до Отешево стигнаа по воден пат, со чамци. Во Отешево се водеа билатерални разговори и имаше свечен ручек. На заедничкиот ручек присуствуваа и претставниците на Европската Унија и Обединетите Нации – Федерика Могерини, Јоханес Хан, Метју Нимиц и Розмари Ди Карло.

Договор за решавање на спорот за името

Протести во Скопје

Потпишувањето на договорот за решавање на спорот за името предизвика протести во Македонија. Демонстрантите пред Собранието на 17.06.2018 се судрија со полицијата. Во безредијата имаше повредени и приведени лица. Според полициски наводи, има неколку повредени полицајци, како и над 25 уапсени учесници на протестите. Официјален организатор на протестите нема.

Договор за решавање на спорот за името

Се протестира и во Грција

Во Грција исто така се протестира. Противниците на договорот за решавање на спорот за името во Атина за време на расправата за доверба на владата на Ципрас се судрија со полицијата пред парламентарната зграда (фото: 16.06.2018). Полицијата мораше да употреби солзавец за да ја разбие толпата која се обиде да влезе во парламентарната зграда. Владата го преживеа гласањето.

Договор за решавање на спорот за името

Уште многу работа

Ставањето потпис на Конечната спогодба за решавање на спорот за името е само еден од чекорите кои следуваат во наредните месеци до конечно решение. Следува ратификација во македонското Собрание, референдум на кој македонските граѓани ќе се изјаснат за договорот, а потоа и ратификација во грчкиот парламент.

Следете нѐ