Притисок врз Уставниот суд

Уставниот суд на Македонија ќе заседава и денеска, но закажани се и протести на студентските организации од трите државни универзитети во Скопје, Битола и Штип, пред највисоката судска инстанца. Владејачката ВМРО ДПМНЕ продолжува со притисокот врз Уставниот суд откако е донесена одлуката да се укине веронауката во основното образование. Од 365 закони и владини одлуки на оваа гарнитура на премиерот Никола Груевски, секој петти е оспорен во Уставниот суд, а секоја трета одлука укината. Владата и ВМРО ДПМНЕ се декларираат дека ќе го реализираат решението на Уставниот суд за укинување на веронауката, вели министерот за образование Перо Стојановски.

Обвинувања за продолжена рака и контраобвинувања

ВМРО ДПМНЕ не престанува со дисквалификациите врз деветте судии од Уставниот суд, обвинувајќи ги дека се продолжена рака на СДСМ и претседателот во заминување, Бранко Црвенковски.

„Никој не може да ни го ускрати правото да ги коментираме одлуките на Уставниот суд, зашто демократското општество подразбира слобода на говор, на изразување и на мисла. Не го доведуваме во прашање спроведувањето на одлуките на Уставниот суд. Нивната работа е апсолутно политизирана“ изјави пратеникот од ВМРО ДПМНЕ, Влатко Ѓорчев.

Со овие ставови не се согласуваат коалициските партнери од ДУИ.

Ермира Мехмети изјави:

„Недемократско е конфронтирање меѓу институции кои се независни и кои си ја вршат работата во согласност со законите и уставот.“

„Јас му порачувам на премиерот Груевски да си ги собере сите свои партиски плукачи против Уставниот суд и да започне со јакнење на институциите“, реагираше Цветанка Иванова од СДСМ.

Без слух за пораките однадвор

Повеќе од две недели трае непримерната институционална и лична дискредитација на судиите од Уставниот суд. Не помагаат ни пораките од Брисел, дека тоа го нарушува институционалниот баланс, и дека е недопустливо да се врши притисок врз судските институции. Пред една недела и американскит амбасадор во Македонија, Филип Рикер, ја бранеше независноста на Уставниот суд како столб на демократското општество:

„Одлуките на Уставниот суд понекогаш се тешки, но властите и граѓаните треба да ги почитуваат и да се изнајде решение граѓаните да живеат како што сакаат, но само во согласност со уставот.“

Автор: Александар Чомовски

Редактор: Жана Ацеска