Рајс гледа напредок во мировниот процес за Блискиот исток

Шефицата на Стејт департментот го повика Израел да го запре натамошното градење еврејски населби на палестинските автономни подрачја и побара видливи подобрувања на животните услови за Палестинците на Западниот брег на реката Јордан. Кондолиза Рајс по разговорите со израелскиот премиер Ехуд Олмерт вчера во Ерусалим и со јорданскиот крал Абдула и претседателот на Палестинците Махмуд Абас претходно во Аман, порача дека градењето нови населби не е во склад со скицата за постигнување мир во регионот, т.н. „роуд меп“. Овој документ што го изработија Американците пред пет години, а го прифатија и другите меѓународни фактори, служи како основа за продолжување на мировниот процес.

Позитивна атмосфера

Вкупната атмосфера во мировните преговори меѓу Израелците и Палестинците Рајс ја оцени како позитивна и посочи дека забележува напредок.„Овде постои заедничка одговорност за атмосферата и реалноста што може да води кон создавање палестинска држава, заснована врз безбедност за Израелците и Палестинците, како и можност за економски развој на Палестинците.“

Конкретни барања до официјален Ерусалим

Рајс побара од израелската влада да ги намали ограничувањата за движење на Палестинците на Западниот брег. Таа најави дека во иднина официјален Вашингтон потемелно ќе проверува дали израелската влада се придржува до ветувањата што ги дава.

Ресорната колешка на Рајс од израелска страна, Ципи Ливни нагласи дека на тоа поле мора да се најде компромис што нема да ја загрозува безбедноста на граѓаните на Израел.„Мислам дека и Израелците и Палестинците сфаќаат оти економијата на Палестинците е во наш интерес, исто како што и безбедноста на Израелците е во интерес на Палестинците. Врз таа подлога се надевам дека ќе најдеме компромисно решение што ќе им даде на луѓето надеж и доверба во преговорите.“

Сепак нови еврејски населби

Наспроти ваквите уверувања и ветувања општинската власт на Ерусалим вчера најави дека ќе се градат натамошни 600 стамбени објекти во еврејската населба Писгат Зеев на Западниот брег. А премиерот Ехуд Олмерт ги отфрли критиките на израелските невладини организации дека тој и неговата влада ги прошируваат еврејските населби со невидено темпо. Тој порача дека Израел и понатаму ќе ги проширува населбите околу источнот дел на Ерусалим, кој е населен претежно со палестинско население и кого палестинската автономна власт го смета за иден главен град на независната палестинска држава.