Рекорден егзодус на Македонците кон Германија

Само во 2015 година, над 24 илјади македонски државјани ја напуштиле својата татковина во потрага по подобар живот во Германија. Од нив, 12 илјади останале. Бројката на доселеници се приближува до рекордни 100 илјади.

Во 2015 година забележан е драматичен пораст на доселувањето од Македонија во Германија, и притоа бројката на македонски државјани кои живеат во оваа земја достигна над 95 илјади луѓе. Со оглед на тоа што во 2009 година бројката на Македонци во Германија изнесувала 62.900 луѓе, тоа значи дека во шест години од 2009 до 2015, 32.700 Македонци ја напуштиле својата земја и се доселиле во Германија.

Во текот на 2015 околу 24 илјади македонски државјани пристигнале во Германија. Половината од нив останале да живеат тука, или вкупно 12.100.

Податоците покажуваат дека трендот на масовно иселување од Македонија кон Германија драматично се засилува во последните години. Во 2014 година, нето-приливот (државјани кои останале во Германија) изнесувал околу 6 илјади луѓе. Во 2015 година, таа бројка е удвоена.

Во последните шест години од 2009 до 2015, 32.700 Македонци ја напуштиле својата земја и се доселиле во Германија

Меѓу регистрираните македонски државјани во Германија особено е голем бројот на оние меѓу 20 и 45 години старост- возраст која се смета за најплодотворна. 38 илјади македонски државјани на оваа возраст се жители на Германија или околу 36 проценти од вкупната бројка. Дополнително, речиси 35 проценти од вкупниот број не се во брак. Околу 10.500 деца од родители со македонско државјанство се родиле во последните 10 години во Германија. Од вкупната бројка жители со македонски пасош во Германија, нешто над 14 илјади се родени во таа земја.

Бројките на германскиот Завод за статистика покажуваат дека над 30 проценти од македонските државјани кои престојуваат во земјата се тука, засега, привремено. Од оние кои биле регистрирани заклучно со декември 2015 година, 13 илјади имале дозвола за престој со траење до една година, а нешто над 18 илјади луѓе има дозвола за престој во времетраење од една до четири години. 

10-те германски топ-градови за живот и работа

На врвот: Минхен

Каде се живее најдобро во Германија, каде стопанството е најсилно? Минхен веќе со години ја предводи листата на најуспешни германски градови. Добрата инфраструктура и високиот квалитет на живот повторна ја доведоа баварската престолнина на топ-позицијата. Но, за првото место треба првенствено да им заблагодари на многубројните индустриски претпријатија, како автомобилскиот производител БМВ.

10-те германски топ-градови за живот и работа

Изненадување: Волфсбург

Градот од Долна Саксонија тешко може да освои награда за убавина. Но, поради динамиката, Волфсбург со своите 124.000 жители стигна на второ место. Тој е град на автомобилите во секој поглед: неговото срце чука во погоните на Фолксваген, кои со површина од 6 квадратни километри се големи колку Гибралтар. Секое работно место во Волфсубрг, директно или индиректно, зависи од Фолксваген.

10-те германски топ-градови за живот и работа

Успешен и динамичен: Инголштат

Тоа што е Фолксваген за Волфсбург, за Инголштат е Ауди: баварскиот град не само што се одликува со голема економска моќ, туку последните години и многу се разви. Бројот на невработените е мал, а на инженери - голем, со овие одлики го освои третото место. Оние кои живеат таму, заработуваат натпросечно, околу 50 илјади евра годишно.

10-те германски топ-градови за живот и работа

Богат и убав: Ерланген

Помалку од 3 проценти од населението на градот зависат од социјална помош, што е најниска стапка во цела Германија. Но, луѓето во Ерланген се и многу образовани, речиси две третини од учениците стекнуваат диплома за средно и вишо образование, а речиси секој трет има универзитетска диплома.

10-те германски топ-градови за живот и работа

Најкреативен: Штутгарт

На петто место на најуспешните градови е престолнината на Баден Виртемберг. Тоа го постигна благодарение на својот голем пронаоѓачки дух. Со над 1.300 патенти на 100.000 жители, Штутгарт е најкреативниот град во Германија. Регионот цвета со децении. Работни места носат автомобилските производители Мерцедес и Порше, како и фабриката за електрични апарати Бош.

10-те германски топ-градови за живот и работа

Продуктивен: Регенсбург

Градот на Дунав пулсира првенствено како град на мислители. Но, има многу повеќе да понуди од живописниот стар центар. Жителите на Регенсбург годишно остваруваат 75.000 евра бруто домашен производ по глава. Посебно се истакнува инфраструктурата-просечното време на возење до најблискиот автопат во Регенсбург е само 3 минути.

10-те германски топ-градови за живот и работа

Креативен: Берлин

Берлин веќе подолго време е во тренд, го посетуваат туристи од цел свет, иако стопански не е многу силен. Па сепак, метрополата и економски сѐ‘ повеќе се развива. Берлин со својата креативна сцена е идеално место за интернет и компјутерската бранша. Многу големи фирми ги преместија своите седишта во престолнината. Бројот на жителите расте, за разлика од многу градови на истокот на Германија.

10-те германски топ-градови за живот и работа

Град на спротивности: Франкфурт

Банкарска метропола, Мека за недвижности и град со највисока стапка на криминал во Германија. Тоа се двете лица на Франкфурт. Младите луѓе таму имаат добра перспектива, на околу 106 места за стручно образование доаѓаат 100 кандидати. Жителите на Франкфурт придонесуваат кон бруто домашниот производ со над 80.000 евра по глава на жител. Со тоа Франкфурт е трет град во Германија според продуктивност.

10-те германски топ-градови за живот и работа

Убав живот на исток: Лајпциг

Уште еден град од источна Германија: Лајпциг привлекува со ниски кирии и разнолика културна сцена, но и со атрактивни работодавачи. Минатите години таму се населија и Порше, БМВ и ДХЛ. Со тоа понудата за работа порасна за 20 проценти. Така, Лајпциг се најде на петто место на најдинамичните градови во Германија.

10-те германски топ-градови за живот и работа

На крајот: Рурската област

Листата на најуспешни градови ја покажува и огромната разлика меѓу германските големи градови. Далеку под сите е структурно слабата Рурска област: Гелзенкирхен, Оберхаузен и Дуисбург се борат против високата невработеност и големите долгови.

Македонскиот државјанин во Германија во просек има 35 години и во земјата живее 16,7 години. Само 15 проценти од вкупно 95 илјади Македонци во Германија, се родени во земјата, сите останати се доселени.

Во статистичките податоци не се опфатени и македонските граѓани кои поседуваат бугарски, или пасош на некоја друга земја членка на ЕУ. Со оглед на новата политиката на германската влада која од почетокот на годинава почна да издава и зголемен број работни дозволи за граѓаните од земјите на Западниот Балкан, се очекува бројката во 2016 година да продолжи да расте. 

Следете нѐ