Самарас смета дека Грција е на добар пат

Андонис Самарас дава оптимистичка прогноза. „Се‘ уште не сме се извлекле од тешкотии, се‘ уште има проблеми што мора да се решат“, рече грчкиот премиер во Атина, додавајќи меѓутоа дека според повеќето експерти, земјата ќе го достигне животниот стандард и ќе има економска сила како пред кризата „не за неколку децении или повеќе генерации, туку за само шест години“.

Во меѓувреме, Грците повторно протестираат против мерките за штедење. На вториот ден од неделата на протести со работа престанаа државните службеници, меѓу нив и наставниците во гимназиите. Штрајкуваат и голем број вработени на универзитетите, како и вработените во пензиските и здравствените фондови. Лекарите пак, во државните болници примаат само итни случаи.

Протестите во Грција утре треба да достигнат врв. Државните службеници тогаш ќе стапат во 48-часовен штрајк и ќе демонстрираат на улица. Грција, под притисок на меѓународните инвеститори, треба да отпушти 15.000 службеници до крајот на 2014 година. Освен тоа, 25.000 административци треба да се префрлат во таканаречената „мобилна резерва“ од каде или ќе бидат префрлани на други работни места, или ќе бидат отпуштени.