1. Прескокни до содржината
  2. Прескокни до главната навигација
  3. Кон други страници на DW

Стано: Филе нема да биде посредник во дијалогот Белград- Приштина

СН/ЕМФ/миа/танјуг14 април 2013

Портпаролот на еврокомесарот за проширување Петер Стано денеска (14.04) негираше дека Штефан Филе би можел да ја преземе посредничката улога во преговорите меѓу властите на Србија и на Косово.

https://p.dw.com/p/18Fe0
Фотографија: European Commission

По денешните наводи на белградскиот дневен весник „Блиц“ дека високата претставничка на ЕУ за надворешна и безбедносна политика Кетрин Ештон нема повеќе да посредува во дијалогот меѓу Белград и Приштина и оти нејзин веројатен наследник е еврокомесарот за проширување Штефан Филе, неговиот портпарол Петер Стано ги демантираше ваквите информации.

„Тоа едноставно не е вистина“, кусо изјави Стано за српската новинска агенција Танјуг.

Весникот Блиц во денешното издание, повикувајќи се на дипломатски извори, објави дека комесарот на ЕУ за проширување Штефан Филе од порано е заинтресиран за улогата на посредник во разговорите меѓу Белград и Приштина.

Според Блиц, високата претставничка на ЕУ за надворешна и безбедносна политика Кетрин Ештон ја завршила својата улога како посредник по осум рунди разговори меѓу премиерите на Србија и на Косово, Ивица Дачиќ и Хашим Тачи, кои останаа без финален договор.

Претставниците на двете земји, во осмата рунда од дијалогот на 2 април во Брисел, не успеаја да постигнат согласност за надлежностите на заедницата на српски општини која српската влада сака да биде формирана на северот на Косово.