Стејт департментот ја критикува македонската влада

Во годишниот извештај на Стејт департментот за состојбата со човековите права во светот се забележува дека најголем проблем во Македонија е што владата не успеала сосема да го спроведе владеењето на правото, што се рефлектира во нејзиното мешање во правосудниот систем и медиумите, селективното гонење на политичките противници и значајното ниво на корупција. Во извештајот се укажува дека тензиите меѓу Албанците и Македонците предизвикуваат загриженост, а исто така и општествената дискриминација на Ромите и другите етнички и верски малцинства.

Во исвештајот на Стејт департментот, САД ја обвинуваат Кина за зголемен број прекршувања на човековите права. Раководството во Пекинг ги заостри цензурата на интернет и постапките против политичките активисти, се вели во годишниот извештај на Стејт департментот за состојбата со човековите права во светот. САД констатираат значително ограничување на слободата на мислење и во Виетнам, а напредок е констатиран во Мјанмар, поранешна Бурма, која како што се вели е „пример што ветува за реформи и во останатите затворени општества“.