Трамп: „Оваа влада работи како добро подмачкана машина“

Американскиот претседател Трамп сведе мини-биланс од првите четири недели од мандатот и си ги пофали своите одлуки. Проблемите ѝ ги припиша на претходната влада и повторно жестоко ги нападна медиумите.

На прес-конференцијата во Белата Куќа, американскиот претседател Доналд Трамп ја бранеше својата политика: „Оваа влада работи како добро подмачкана машина“, рече тој пред новинарите во Вашингтон.

Трамп е уверен дека ги спровел ветувањата дадени во предизборната кампања и оцени дека веројатно ниту еден американски претседател досега не бил толку успешен во толку кратко време. Според перцепцијата на американскиот претседател, неговата политика наидува насекаде на големо одобрување и во светот на бизнисот има бран на оптимизам. Демократите се виновни што сѐ уште нема согласност за неговиот кабинет, вели Трамп.

Проблемите префрлени на грбот на Обама

Тој се пожали дека од својот претходник Барак Обама наследил хаос кој сега треба да се расчисти: „Наследив хаос, дома и во странство“, рече Трамп. „Работните места наголемо се иселуваат од нашата земја, Блискиот Исток е катастрофа.“ Во објаснувањето колку тешка состојба наследил, Трамп како пример ја спомена и состојбата во Северна Кореја. Кризите во Северна Кореја и Блискиот Исток, наведе тој, се меѓународни конфликти кои траат долго и со кои пред него се занимавале повеќемина американски претседатели.

Дебатата околу можните контакти со Русија, според Трамп, ја отежнуваат политичката соработка со Кремљ. „Стана потешко да се дојде до договор“, рече американскиот претседател. Притоа, добри односи со Русија се нешто што се посакува: „Ние сме многу моќна нуклеарна сила, а истото важи и за Русија. Ако имаме добри односи со Русија,тогаш тоа е нешто добро, а не лошо“, рече Трамп. Тој најави дека ригорозно ќе бидат гонети лицата кои на медиумите им проследуваат доверливи информации од Белата Куќа. „Тоа се криминални протекувања“, оцени Трамп, додавајќи дека бил шокиран кога видел дека во медиумите има многу доверлива содржина од неговите телефонски разговори со Мексико и Австралија.

Нов декрет за доселување

Американскиот претседател најави и нов декрет за доселувањето, откако судовите ја стопираа контроверзната забрана за влез во САД на граѓани од неколку доминантно муслимански земји. Не наведувајќи детали од новиот документ, Трамп потенцираше дека станува збор за опширен декрет „за заштита на нашиот народ“.

И на оваа прес-конференција американскиот претседател ги повтори острите критики на сметка на медиумите, велејќи дека се обраќа директно до американскиот народ, со оглед на тоа што медиумите не сакале да известуваат за вистината и ги премолчувале успесите на неговата влада.

Инаку прес-конференцијата беше всушност свикана со цел да биде претставен новиот кандидат на Трамп за министер за труд. Функцијата би требало да ја извршува Александер Акоста, стручњак во сферата за трудово право. Номинацијата на Акоста следува откако еден ден претходно се повлече досегашниот кандидат за таа функција, Ендру Пуздер.

Трамп: популист, могул, претседател

Семејството, империјата

Во кругот на најмилите: Доналд Трамп со сопругата Меланија, ќерките Иванка и Тифани, неговите синови Ерик и Доналд јуниор, како и внуците Кај и Доналд јуниор III. Трите деца работат како заменици во „Империјата Трамп“.

Трамп: популист, могул, претседател

Неговиот татко: Фредерик јуниор

Почетниот капитал за своите бизниси Трамп го добил од својот татко Фредерик. Тој на почеток му подарил еден милион долари, а по смртта во 1999 на Доналд и неговите три останати деца им оставил во наследство имот од 400 милиони долари.

Трамп: популист, могул, претседател

Милијарди заработени со помош на марката Трамп

Трамп инвестира агресивно, постојано доживува неуспеси, но долгорочно има успешен биланс, на пример со Кулата Трамп во Њујорк. Својот имот Трамп денес го проценува на десет милијарди долари. Експертите сметаат дека пореална е третина од оваа сума.

Трамп: популист, могул, претседател

„Многу добар, многу паметен“

Тао го вели Трамп самиот за себе, додавајќи дека студирал на елитниот универзитет Вортон во Филаделфија, каде се стекнал со бечелор-диплома во 1968. година.

Трамп: популист, могул, претседател

Капетан Трамп

Претходно неговиот татко го испратил 13-годишниот Доналд во воен интернат во Корнвол за да учи диспциплина. На крајот на школувањето се стекнал дури и со офицерски чин.

Трамп: популист, могул, претседател

Со коскен шилец избегнат ангажман во Виетнам

Трамп меѓутоа успеал да избегне учество во војната во Виетнам. Спортскиот млад човек бил прогласен за неспособен за војска поради коскен шилец во петицата.

Трамп: популист, могул, претседател

Првата сопруга: Ивана

Во 1977 година Трамп се ожени со чешката манекенка Ивана Зелничкова. Три деца се родени во бракот кој постојано беше во сенка на гласините за различни афери.

Трамп: популист, могул, претседател

Семејство број два

Во 1990 година Трамп се разведе од Ивана и се ожени со својата втора сопруга, 17 години помладата Марла. Заедничката ќерка се вика Тифани.

Трамп: популист, могул, претседател

Девојки, девојки

Трамп не се покажуваше радо во јавноста само со својата жена, туку милуваше да се фотографира опкружен со „мисици“ од различни избори на убавици. Од 1996 до 2015 година тој беше главниот спонзор на изборот за Мис универзум во САД.

Трамп: популист, могул, претседател

Како се прават пари

Како брзо да се заработат милиони? Книгата на Трамп „Начинот на склучување зделки“ дава упатства, таа е делумно автобиографска, делумно советник за амбициозни бизнисмени. Ова дело на Трамп не само што стана бестселер, туку и го стави авторот во фокусот на вниманието на јавноста.

Трамп: популист, могул, претседател

Трамп во политиката

Трамп настапуваше во свое ТВ-шоу, се појавуваше пред камери, но со политика не се занимаваше. Но, на 16 јуни 2015 година најави учество во трката за избор на републикански претседателски кандидат. Неговиот слоган е „Да ја направиме Америка повторно голема“. Кампањата ја водеше со настапи со семејството и со навреди кон доселениците, муслиманите, жените и своите конкуренти.

Трамп: популист, могул, претседател

Функција со достоинство

Дали популистот и шоумен сега ќе се претвори во предводник на слободниот свет?Многумина тоа не можат да си го замислат. Но, животниот пат на Доналд Трамп покажува: овој човек располага со преобразувачка способност на камелеон.

Следете нѐ