Чавез погребан во Каракас

Поворката на приврзениците на Чавез до неговото последно почивалиште беше долга 12 километри.

На крајот на втората процесија за покојниот венецуелски претседател Уго Чавез, ковчегот со неговите посмртни останки беше положен во Музејот на револуцијата во венецуелската престолнина Каракас, инаку поранешна касарна.

Саркофагот од црн мермер е ставен врз камен постамент со форма на цвет. На предниот дел на саркофагот е испишано името на Чавез и годините на неговото раѓање и смрт.

58-годишниот Чавез почина на 5 март по долга битка со ракот. Музејот од денеска треба да биде отворен за јавноста. За Чавез ќе биде изграден и посебен мавзолеј.

Првично властите сакаа да го балсамираат телото на Чавез, но во средата привремениот претседател на Венецуела, Николас Мадуро појасни дека по мислење на научници балсамирањето ќе биде многу тешко, затоа што одлуката за оваа постапка требало да се донесе многу порано. Ова мислење било изразено од руски и германски експерти за балсамирање, кои за таа цел биле пристигнати во Каракас.