Шоу на Доналд и Биби

Американскиот претседател Трамп и израелскиот премиер Нетанјаху демонстрираат единство и зборуваат за „ултимативен дил“, но очигледно немаат реалистички мировен план за Блискиот Исток, смета Карстен фон Намен.

Политиката секогаш во еден дел е и шоу-бизнис. Никакво чудо што американскиот претседател Доналд Трамп и израелскиот премиер Бенјамин Нетанјаху се опсипуваа меѓусебно со пријателски изјави и пофалби за лидерски способности на својата прва средба. 

Пораката беше: погледнете, ние сме двајца државници кои меѓусебно одлично се разбираат и заеднички можат да придвижат некои работи. Работи кои по годините на конфликт меѓу Нетанјаху и претходникот на Трамп, Барак Обама, отвораат ново, сјајно поглавје во американско-израелските односи. Работи кои ќе го ограничат режимот во Иран со неговите нуклеарни планови, ќе го победат исламскиот тероризам и дури можеби ќе му донесат мир на целиот Блиски Исток.

Очајнички се бараат позитивни вести

На двајцата политичари им се потребни позитивни новински наслови, на Трамп дури повеќе отколку на Нетанјаху: принудна оставка на советникот за безбедност по само 24 дена на должност, пресинг-прашања од медиумите и парламентот околу односот на тимот на Трамп со Русија, исмејување и презир поради дилетантските грешки во донесувањето на декретот за доселувањето, номиниран министер за труд кого претседателот мораше да го повлече, соочен со недоволна поддршка од сопствените редови да биде потврден на функцијата. Еден месец откако Доналд Трамп ја презеде претседателската должност, Белата Куќа е во кризен модус, иако претседателот самиот тоа никогаш не би го признал.

А Нетанјаху? Тој има свои проблеми. Радикалните елементи од неговата десноориентирана и ноторно нестабилна владина коалиција во Израел постојано бараат анексија на окупираниот Западен Брег, а жителите на доселеничките населби се разочарани што САД сепак не поддржува недозволена градба на населби на окупираните територии. Демонстратрираното единство со новиот американски претседател, со кого датира познанство уште од 1980-те години и двете семејства одржуваат пријателски врски, ја јакне позицијата на Нетанјаху во Израел: тој повторно може да се презентира како близок човек на големиот сојузник и со тоа како гарант на израелската безбедност.

Карстен фон Намен

Мировна иницијатива како маневар за залажување

Значи, итно се потребни успеси или барем позитивни слики и можеби неколку доброзвучни визии за мир на Блискиот Исток. Во оваа категорија се вклопува идејата за нова преговарачка рунда, во која би биле вклучени не само Израел и Палестинците ( и САД), туку и некои арапски соседни држави како Јордан и Египет. 

Израелскиот премиер овие држави ги нарече „нашите нови арапски партнери“, со не сосема неосновано укажување дека раководствата на овие и други држави, како на пример Саудиска Арабија, барем подзаскриено, како поитна ја оценуваат заканата од исламските екстремисти, отколку нивното отфрлање на политиката на Израел во окупираните области.

Една или две држави?

Меѓутоа, проблемот е што овде сметката се прави без крчмарот. Зашто, широката јавност во арапскиот свет нема да прифати никави „регионални решенија“ кои одат на штета на Палестинците. Притоа, и авторитарните арапски властродржци мораат да водат сметка за ваквото расположение.

Слично важи и за втората идеја, изнесена на прес-конференцијата на Трамп и Нетанјаху - интересно, одржана пред нивните разговори: решението на конфликтот меѓу Израел и Палестинците не мора нужно да биде постоење на две држави, можно е решение со постоење на една држава. „Можам тоа да го замислам“, изјави Трамп, доколку тоа го прифаќаат Израел и Палестинците.

„Ултимативен дил“

Но како би изгледал овој „ултимативен дил“, како што го нарече Трамп? Една заедничка држава од Средоземното Море до Јордан? Тогаш Израел би го загубил својот еврејски идентитет. Враќање на ситуацијата од 1967. година, со Појасот Газа како дел од Египет и Западниот Брег како дел од Кралството Јордан? Или сепак со палестинска автономна управа без државност?

Сето тоа е нереалистично. А вистината е: ниту „Доналд“ ниту Бенјамин - „Биби“ Нетанјаху немаат реалистичен план за вистински мир на Блискиот Исток. Но, тоа и не е цел на демонстрацијата. Главно, фотографиите изгледаат добро и шоуто продолжува.

Израелските населби на палестински територии

На палестинските територии има повеќе од 200 населби

Според податоците на организацијата за човекови права Бетселем, на Западниот брег и во Источен Ерусалим од 1967 до средината на 2013 година се изградени 125 официјални израелски населби и околу сто „диви населби“. Израелските власти, според Канцеларијата на ОН за хуманитарна помош (ОЦХА), за изградба на населби на палестински територии заплениле 35 проценти од површината на Источен Ерусалим.

Израелските населби на палестински територии

Нема шанса за мир?

Во моментов еврејска населба се гради во Хар Хома, на Западниот брег, меѓу Ерусалим и Витлеем. Водечки претставници на Палестинците оценуваат дека израелската политика за градење населби го уништува решението „две држави“ и го спречува мирот со Палестинците. Изградбата на населбите на палестински територии е критикувана и во меѓународни рамки.

Израелските населби на палестински територии

Израел конфискува палестински приватни имоти

Новиот закон за ретроактивно легализирање на станови на доселеници на Западниот брег и во Источен Ерусалим е спорен. Со него се погодени 16 населби. За еврејските доселеници да можат да останат каде што се, предвидена е финансиска отштета за Палестинците кои се сопственици на земјиштето.

Израелските населби на палестински територии

Уривање на Амона

Новиот израелски закон не важи за куќите на доселениците за кои веќе има судска одлука за уривање. Партијата на доселениците имаше намера со законот да спречи принудно расчистување на населбата Амона. Сепак, куќите на 40 семејства беа испразнети минатата недела, а само четири дена потоа се почна со уривање.

Израелските населби на палестински територии

Барикади и безредија

Одлуката на израелскиот Врховен суд за уривање на Амона беше донесена уште на крајот на 2014 година. Рокот беше повеќепати одлаган. Десните групи и доселениците до крај се обидуваа да спречат евакуација и уништување на местото. Многумина доаѓаа од други места специјално за да демонстрираат. И на спротивната страна имаше насилни протести на Палестинците.

Израелските населби на палестински територии

Ескалација при принудното иселување

Жителите на Амона веруваат дека Западниот брег, окупиран од страна на Израел од 1967 година, е дел од територијата која Бог во Библијата му ја наменил на еврејскиот народ. На Западниот брег и во Источен Ерусалим живеат околу 600.000 Израелци. Меѓу доселениците и Палестинците постојано има судири.

Израелските населби на палестински територии

Нов дом

На приватни имоти на Палестинци спротивно на законот се изградени околу 4000 станови. Тие треба или да бидат испразнети, или со новиот закон треба да бидат ретроактивно легализирани. Многу од жителите на Амона имаат нов дом во соседните населби, како овде, во Офра.

Израелските населби на палестински територии

Принудно иселување во Офра

Но и во Офра има нелегални куќи. До 5 март тука треба да бидат испразнети девет куќи кои се изградени на приватен имот на Палестинци. Куќата мора да ја напушти и семејството Бен Шушан.

Следете нѐ