1. Прескокни до содржината
  2. Прескокни до главната навигација
  3. Кон други страници на DW

Јајца и чадни бомби летаа во украинското собрание

27 април 2010

Парламентарците навистина станаа агресивни, но на крај сепак го изгласаа 25 годишното продолжување на наемот на базата на руската црноморска флота на Крим. Украина за возврат ќе добие поевтин природен гас од Русија.

https://p.dw.com/p/N7l0
Денешното гласање во украинскиот парламент помина со „мали инциденти“Фотографија: AP

Украинскиот парламент во Киев го изгласа продолжувањето на договорот со Кремљ, и покрај тоа што поделените пратеници отворија вистинска војна едни против други. Во украинското собрание скоро и да не се дишеше од активираните чадни бомби. Неколку црни чадори го штитеа претседателот на собранието од хартиените топки и јајцата што пратениците ги фрлаа кон него, додека други пратеници си ги затнуваа носевите или ставаа заштитни маски.

Ова е првиот договор што Украина го потпишува со Русија, откако на власт дојде претседателот Виктор Јанукович, кој се залага за поблиски односи со Кремљ. Спогодбата е веќе ратификувана од долниот дом на руската Дума и со него се предвидува 25 годишното продолжување на наемот на базата на руската црноморска флота на Крим, по истекувањето на актуелниот договор во 2017 година.

„Чин на предавство“

Ukraine Abstimmung Schwarzmeerflotte Parlament
Несогласувањата ескалираа, договорот е усвоенФотографија: AP

Украина за возврат ќе добие за 30 насто поевтин гас од Русија, што на рок од десет години ќе и` донесе заштеда од триесет милијарди евра. Рускиот нафтен концерн „Гаспром“ досега во три наврати го сопираше испорачувањето гас кон Украина, која инаку е најважната транзитна земја за рускиот гас, поради неподмирените долгови од страна на владата во Киев.

Дмитриј Медведев и Виктор Јанукович уште минатата недела го потпишаа договорот, кој опозицијата го нарече „чин на предавство“ и се закани дека ќе ја прекине ратификацијата, затоа што смета дека секакво продолжување на руското влијание во земјата ќе бара промена на уставот и референдум.

Пред зградата на парламентот во Киев и понатаму се собрани приврзаниците на опозицијата, кои протестираат против договорот.

Автор: ТТ/ЖА/дпа/миа

Редактор: Александра Трајковска