Ќе „дојава“ ли „Воинот“ до извештајот на Еврокомисијата?

Евроамбасадорот Соренсен денеска одбегна да коментира дали неговото поставување на плоштадот „Македонија“ во Скопје ќе значи влошување на односите меѓу Македонија и Грција.

„ Во контекстот на ова прашање, најдобро што можам да сторам и ќе го сторам во моментов, е да речам дека ќе видиме што ќе се случи. Какво влијание ќе има тоа на извештајот, чекаме одговор, чекаме да видиме како ќе се одвиваат работите. Јасно е дека работиме на извештајот, но тој излегува дури во октомври. Добрососедските односи се меѓу двајца соседи и треба да видиме како ќе се развиваат работите. Како и претходно, имавме коментари по ова прашање и би се изненадил ако нема коментари за ова и во наредниот период, но моментално не можеме да оцениме што ќе се случи. Ќе треба да почекаме“, рече Соренсен.

Кацин: „Трн во око за Грција“

Поставувањето на споменикот „Воин на коњ“ на плоштадот „Македонија“ во Скопје, денеска (17.06) го коментираше и словенечкиот европратеник Јелко Кацин. Според него, тој претставува свесна провокација која оди на штета на европската интеграција на земјата.

За Кацин е спорно и што споменикот се поставува во време кога Грција се наоѓа во тешка економска и политичка ситуација.

„Поставувањето на споменикот на Александар Велики среде Скопје претставува 'прст во око' за соседна Грција, која во моментов се наоѓа во најтешките политички и економски искушенија во последните децении. Наместо одмерена, државотворна политика во добрососедски дух и испружена рака, Владата на Република Македонија отворено и свесно провоцира на штета на европската интеграција на ПЈРМ. Наместо да се овозможи Грција во очите на граѓаните на Македонија да добие статус на добар сосед и пријател, Груевски свесно ја претставува Грција како најголем и најдобар непријател на Македонија“, вели европратеникот Кацин во писмената изјава.

Автор: СН/ЕМФ/макфакс

Редактор: Елизабета Милошевска Фиданоска