Џамија на дресот на Келн предизвикува политички потреси

Во нормални околности, загубата на навивач или член е причина за загриженост за секој фудбалски клуб, но членот на германската Бундеслига се обиде да ги стави принципите пред профитот.
Во вторникот, германскиот клуб јавно му посака збогум на еден навивач кој не се согласуваше со изгледот на новите дресови за гостинските натпревари на Келн.
Покрај келнската Катедрала, реката Рајна и други обележја на градот, на новиот дрес на Келн е извезена и големата џамија во градот.
Навивачот тврди дека таквата одлука го претвора фудбалскиот клуб во „верска организација“, и дека тој не може „да се идентификува со муслимани и џамии“. Клубот експресно го прифати неговото барање, и го исклучи од членство.

Градот Келн има голема муслиманска заедница и клубот смета дека додавањето на џамијата на дресот ќе биде „знак на инклузивност во градот“.
Но келнската Централна џамија, која беше отворена во 2018 година од турскиот претседател Реџеп Таип Ердоган, е контроверзен избори, затоа нејзината изградба беше ко-финансирана од верската заедница на турската влада во Германија (ДИТИБ).
Директорот на Келн, Александер Верле ја објаснуваше одлуката за таблоидот Билд.
„Џамијата е симболична за големата турска заедница во Келн, меѓу кои има многу навивачи на ФК Келн. И таа стана неизоставен дел од панорамата на градот“.
„Тоа важи без оглед на нечиј политички став за раководителот на џамијата (ДИТИБ)“, рече Верле.

Потегот на фудбалскиот клуб предизвика различни реакции на социјалните мрежи и меѓу политичарите.
Основачот на либералната џамија во Берлин, Сејран Атес го критикуваше ставот на Верле поради некоректната претпоставка дека сите Турци во Германија се „една хомогена маса“.
Политичарот на ЦСУ, Михаел Куфер смета дека џамијата не смее да се изедначува со Келнската катедрала која е вистински симбол на градот. 
„Тоа е една културолошка глупост“, коментираше Куфер за Билд.

Волфганг Бозбах од ЦДУ, апелира на поголема одмереност.
Клубот сака да ја прикаже „силуетата на градот“, а кон неа „припаѓа и маркантната фигура на џамијата“, смета Бозбах.

Католичката црква ја поздрави одлуката на клубот. Градскиот бискуп Роберт Клајне вели дека ФК Келн на овој начин се поставил против дискриминацијата и расизмот.

„Доколку имаме навивачи кои имаат толку тесна слика, тогаш подобро да се ослободиме од нив“, изјави Клајне за локалното радио дополнувајќи дека на дресовите можела да се стави и силуетата на градската синагога.

Муслиманите сочинуваат над 10 проценти од населението на Келн, четвртиот по големина град во Германија. Централната џамија беше отворена во 2018 година и една од најголемите во Европа со купола висока 35 метри.