Членството во НАТО ја зголеми безбедноста на Македонија

Северна Македонија како членка на НАТО ја одбележува 75-годишнината од создавањето на најмоќниот воено-политички сојуз. Оценката на претседателот Стево Пендаровски е дека членството во НАТО значително ја зголеми безбедноста на македонската држава, како дел од семејството на евро-атлантските демократии.

„Сите 32 земји - НАТО сојузници сме обврзани да ги чуваме слободата, заедничкото наследство и цивилизацијата на народите засновани на принципите на демократија, индивидуална слобода и владеење на правото, како основа на системот на колективна одбрана и заштита на мирот и безбедноста“, вели претседателот по повод одбележувањето на 75-годишнината од формирањето на Алијансата.

Гарант за безбедноста

Министерката за одбрана, Славјанка Петровска, по повод 4. Април – Денот на НАТО се обрати до граѓаните со видео порака. „Денес, на 4 април, одбележуваме важен момент во историјата на меѓународната безбедност и одбрана – Денот на формирањето на Северноатлантската алијанса. Пред 75 години, нациите основачи на НАТО ја поставија основата за организација што ќе стане камен-темелник на колективната безбедност и демократските вредности ширум светот. Во годината во која Северна Македонија одбележува четири години членство во НАТО, а со сојузниците во Алијансата одбележуваме 75 години од нејзиното основање, можеме да кажеме дека ги имаме сите предиспозиции да бидеме силен гарант на нашата независност и сувереност“, вели Петровска.

Тоа е, вели министерката, успехот на нашата генерација, но во тој успех се вградија и сите оние кои пред нас нè водеа кон истата цел – држава чија безбедност и стабилност е гарантирана и однатре, но и од нашите сојузници.

„Како министерка за одбрана, чувствувам голема чест и одговорност што ја предводам одбраната во овие времиња, кога соработката и колективната одбрана се поважни од кога било. Нашата интеграција во НАТО не е само потврда за нашата посветеност кон мирот и стабилноста, туку и сведоштво за нашата подготвеност да придонесуваме кон глобалната безбедност“, вели Петровска.

 

Нова динамика

Министерот за надворешни работи Бујар Османи смета дека е време за нова динамика во европските и евроатлантските интеграции на земјите од Западниот Балкан, бидејќи забрзувањето на овие процеси е клучно за спротивставување на руските намери и консолидирање на целокупната стабилност

„Нашиот регион сѐ повеќе станува поле за геополитички натпревар, а Западниот Балкан е на линија на огнот на цивилизацискиот судир помеѓу Западот и Истокот. Руската воена агресија врз Украина покажа дека безбедносната архитектура во Европа е нарушена, а како што сум истакнал и во други прилики, Украина е само првата станица од руските империјалистички амбиции. По Украина, руската агресија се очекува да продолжи и наредна станица да бидат земјите од Западен Балкан“, рече Османи, кој присуствуваше на состанокот на шефовите на дипломатиите на земјите членки на НАТО во Брисел. 

Министерски состанок е значаен затоа што заеднички со сите сојузници во седиштето на НАТО во Брисел беше одбележана 75-годишнината од формирањето на Алијансата. „И овој важен јубилеј коинцидира со приклучувањето на Шведска во нашето трансатлантско семејство. Ова е силна потврда дека политиката на отворени врати на НАТО не само што е жива, туку е и зајакната и со силен фокус на сите земји сојузнички”, потенцираше Османи.