Се заострува конфликтот меѓу Израел и Хезболах

Израелската војска денеска ги засили нападите врз најголемиот град на југот во Појасот Газа и бегалскиот камп во централниот дел на палестинската територија.

Портпаролот на израелската армија Даниел Хагари изјави дека бомбардирањето на бегалскиот логор трае веќе три дена и дека уште една бригада е распоредена во Кан Јунис, кој се наоѓа во центарот на жестоките улични борби.

Тој навести и можно „ширење на конфликтот на север“ долж либанската граница, каде што не престанува размената на оган меѓу израелската армија и екстремистите на Хезболах од почетокот на војната во Појасот Газа.

Во обиколка на границата во средата, началникот на израелскиот Генералштаб Херзи Халеви рече дека војската на Израел  „одобри планови за различни непредвидени ситуации“ и дека треба да биде подготвена за напад.

Претходно, израелскиот министер за надворешни работи Ели Коен изјави дека лидерот на либанската милитантна група Хезболах, Хасан Насралах, може да биде следната цел на Израел.

Коен го изјави ова еден ден по нападот на Хезболах во кој беа ранети 11 лица во северен Израел.

Хезболах, поддржан од Иран, го напаѓа Израел со ракети од почетокот на војната со Хамас на 7 октомври, поради што повеќе десетици илјади Израелци се принудени да се евакуираат од пограничната област.

За време на обиколката на границата со странските амбасадори, Коен рече дека лидерот на Хезболах, Хасан Насралах, „мора да разбере дека тој е следниот“.

Тој додаде и дека Хезболах мора да го почитува примирјето од 2006 година, со кој групата се повикува да се повлече од пограничната област.

„Ќе работиме на тоа да решиме сѐ по дипломатски пат, ако не успее, сите опции се на маса“, рече Коен.