Во Украина откриена масовна гробница од ерата на Сталин

Во близина на Одеса, во јужниот дел од Украина, се откриени коски на 5.000 до 8.000 луѓе, закопани во неколку гробови. Бројката може и да расте, со оглед што работите на ископувањето уште се во тек, изјави Сергеј Гузаљук, регионален раководител на Украинскиот институт за национално сеќавање. Тој претпоставува дека станува збор за луѓе кои биле ликвидирани меѓу 1937 и 1939 година од страна на советската тајна полиција НКВД. Ова е најголемата досега откриена масовна гробница во Украина, а на неа се наишло случајно при градежните работи за проширување на аеродромот во Одеса, истакнува Гузаљук. Во околината и порано биле пронајдени масовни гробови. 

Идентификацијата на жртвите е невозможна, вели Гузаљук, зашто документите од времето на советскиот диктатор Јозеф Сталин се наоѓаат во Москва. „Овие документи, во време на актуелната влада во Русија, во никој случај нема да ни бидат достапни и предадени“, вели тој. 

Откако Русија го анетираше Крим во 2014 година, односите меѓу Москва и Киевдрастично се влошија. 

Според проценките на украинските историчари, во времето на сталинизмот стотици илјади Украинци биле затворени во гулаци, логори за присилна работа или пак биле егзекутирани. Освен тоа, милиони Украинци умреле за време на големиот глад меѓу 1932 и 1933 година, предизвикан од Сталин преку принудната колективизација во земјоделството. Украина тоа го смета за организиран геноцид.