1. Прескокни до содржината
  2. Прескокни до главната навигација
  3. Кон други страници на DW

Деликатен контакт - Доналд Трамп Јуниор и Викиликс

ЖА / агенции
14 ноември 2017

Најстариот син на Доналд Трамп за време на изборната кампања контактирал со платформата која објави хакирани имеили од Хилари Клинтон.

https://p.dw.com/p/2nabU
Donald Trump Jr
Фотографија: Picture-Alliance/AP Photo/J. S. Applewhite

Уште едно откритие во руската афера на американскиот претседател Доналд Трамп -  неговиот најстар син за време на претседателската изборна кампања во САД бил во контакти со Викиликс. Трамп Јуниор самиот објави повеќе информации кои ја потврдуваат комуникацијата, обидувајќи се да го минимизира нејзиното значење. Неговата реакција следи откако магазинот „Атлантик“ објави извештај за содржината на информациите. 

Новостите се пикантни, со оглед на улогата што ја одигра Викиликс за време на претседателската изборна кампања, кога објави хакирани имеили од таборот на Демократската партија. Хилари Клинтон како претседателска кандидатка претрпе значителна штета. Американските тајни служби ја обвинуваат руската влада дека ги влечела конците во вршењето хакерски напади.

Дел од разоткриените информации потекнуваат уште од времето кога платформата Викиликс сѐуште ги немаше објавено украдените имеили од шефот на изборниот штаб на Клинтон, Џон Подеста. Викиликс во една од информациите советува Трамп во случај на пораз, да не го признава, туку да вложи жалба. Основачот на Викиликс, Џулијан Асанж првично на Твитер напиша дека не може да ги потврди информациите, но откако Трамп Јуниор ги објави, тој изврши нивно натамошно проследување.

Најстариот син на Доналд Трамп се наоѓа во деликатна ситуација,  зашто и без тоа се најде во фокусот на руската афера. Во јули годинава тој беше принуден да признае дека за време на претседателската кампања се сретнал со руска адвокатка, со која се согласил да разговара по понудата да добие компромитирачки материјал за Клинтон.

Аферата околу можното влијание на Русија врз американските претседателски избори е предмет на истрага на повеќе комисии во Конгресот, а за нејзино расветлување е именуван и специјален обвинител.