1. Прескокни до содржината
  2. Прескокни до главната навигација
  3. Кон други страници на DW

Збогување со големиот Јуп Хајнкес

Тобиас Елмајер20 мај 2013

Јуп Хајнкес неодамна од клупата на Бајерн го водеше својот последен натпревар во Бундеслигата. По 48 години активен фудбалски ангажман тој се повлекува. Коментар на Тобиас Елмајер.

https://p.dw.com/p/18b0U
Фотографија: picture-alliance/dpa

На конференцијата за печат Јуп Хајнкес мораше да се бори со солзите. Со „кнедла во грлото“ им се заблагодари на навивачите на Борусија Менхенгладбах (неговиот матичен клуб) за прекрасното испраќање кое му го приредија. „Тоа покажа дека ова е мојот дом“, изјави Хајнкес додека новинарите со аплауз го поздравуваа. Навивачите на Борусија истакнаа голем број транспаренти со кои го испратија својот некогашен играч и тренер. Други тренери во минатото во Менхенгладбах добиваа свирежи и епитет на предавници, но не и Хајнкес.

Хајнкес остави длабока трага во Бундеслигата во своите 1011 натпревари како играч и тренер. Како играч важеше за извонредно амбициозен, но и како тренер не успеваше да го скрие својот внатрешен немир. Целото негово лице се зацрвенува кога е возбуден, па затоа и го доби прекарот „Озрам“- според истоимената фабрика за производство на светилки. Првите титули во Бундеслигата ги освои уште во 1989 година, но за Хајнкес се покажа како среќна околност тоа што баварскиот гигант го отпушти и покрај успесите. Продолжи со ангажмани во Португалија и Шпанија, а врв на дотогашната кариера му беше освојувањето на Лигата на шампионите со Реал Мадрид во 1998 година.

Trainer Jupp Heynckes 1989
Прослава на првата титула со Бајерн Минхен во 1989 годинаФотографија: picture-alliance/dpa

Низ тој ангажман стекна самодоверба и опуштеност која му помогна во подоцнежните години од кариерата. Следуваше едно кратко враќање во Бајерн, при кое успеа да ја спаси сезоната на баварците и да им обезбеди пласман во Лигата на Шампионите, а потоа продолжи во Бајер Леверкузен. И со овој тим, кој дотогаш се наоѓаше во голема криза, успеа да избори пласман во Лигата на шампионите и да го врати во врвот на германскиот фудбал. Следуваше третото, последно враќање во Бајерн Минхен, кое може да се опише и како врв на неговата тренерска кариера. Од скапиот збир на ѕвезди од целиот свет, Хајнкес успеа да создаде вистински тим кој годинава го достигна својот зенит со убедливото освојување на титулата во Бундеслигата и пласманот во финалето на Лигата на шампионите. На играчите на Бајерн им влеа борбен дух, а притоа изгради ретко атрактивна игра.

Покрај сите успеси, остана скромен, тивок и полн со самодоверба. Без оглед дали Бајерн до крајот на сезоната ќе се закити со титулите во Лигата на Шампионите и во германскиот Куп, 68-годишниот Хајнкес веќе сега е еден од најголемите тренери во историјата на земјата.

Trainer Jupp Heynckes gewinnt mit Real Madrid
На „врвот“ на Европа со Реал Мадрид во 1998 годинаФотографија: picture-alliance/dpa

Управата на Бајерн одлучи да го замени Хајнкес со далеку помладиот Пеп Гвардиола-големо тренерско име кој ги освои сите можни титули со Барселона. На Шпанецот нема да му биде лесно да го подигне Бајерн на уште повисоко ниво, пред се на човечки план. Зад Јуп Хајнкес ќе остане голема празнина.