Советот за безбедност треба да расправа за Северна Кореја
13 февруари 2017
Советот за безбедност на Обединетите нации денеска попладне (според локално време) би требало да се состане на вонредна седница и да расправа за новиот ракетен тест на Северна Кореја“, изјави претставник на американската амбасада при Светската организација. Новотестираната „балистичка ракета од среден дострел Пукгуксонг-2“ е нов тип на систем на стратешко вооружување, јавија пак севернокорејските медиуми.
Властодржецот во Пјонгјанг Ким Јонг Ун самиот на лице место раководел со подготовките за лансирањето на ракетата земја-земја. Проектилот, според севернокорејски информации, може да транспортира и атомска боева глава. Народната армија на Северна Кореја сега може нејзините стратешки обврски „попрецизно и побрзо да ги извршува на секое место: под вода или на земја“, гласеше информацијата на државните медиуми во Пјонгјанг.
Прекршување на повеќе резолуции на ОН
Овој тест претставуваше прво лансирање на севернокорејска ракета од стапувањето на функцијата на новиот американски претседател Доналд Трамп. Тој, јапонскиот премиер Шинзо Абе и јужнокорејскиот претседател Хванг Кјо Ах остро го осудија ракетниот тест на комунистичката земја.
Северна Кореја во минатата година ја провоцираше меѓународната заедница со два теста на атомско оружје и цела редица ракетни тестови. Земјата со тоа прекрши повеќе резолуции на Обединетите нации. Јужна Кореја претпоставува дека соседната земја со ракетните тестови има намера да го форсира развојот на балистички интерконтинентални проектили, кои вооружени со атомски боеви глави би можеле да стигнат до САД.