آستراليا د نائورو له مهاجر کمپه وروستي کم سنه مهاجر باسي

د نائورو پر کمپ د بشري حقونو سازمانونو انتقادونه بالاخره آسترالیا مجبوره کړه چې له هغه ځایه هغه مهاجر وباسي چې قانوني سن ته نه دي رسېدلي. د رپوټونو له مخې وروستي کم سنه مهاجر هم له دغه کمپه وتلي دي.

د آسترالیا صدراعظم سکات موریسون اعلان وکړ چې په نائورو ټاپو کې د مهاجرو په نوموړي کمپ کې له ۱۰۹ کم سنه مهاجرو، څخه یوازي ۴ تنه یې پاته دي چې ډير ژر به له دغه کمپه ولیږدول شي. هغوی له شپږو میاشتو راهيسي په دغه کمپ کې ساتل شوي ول.

خو د آسترالیا حکومت نه غواړي چې دغه کم سنه مهاجر آسترالیا ته ولیږدوي، بلکي غواړي چې یو دریم هیواد ته يې واستوي. موریسن وویل چې دغه څلور تنه پاته کم سنه مهاجر کولای شي چې په امریکا متحده ایالاتو کې له خپلو کورنیو سره یو ځای شي.

آسترالیا د مهاجرو پر وړاندي د خپل سخت سیاست له امله چې نه غواړي هیواد ته یې مهاجر داخل شي، د بشري حقونو سازماونو تر انتقاد لاندي راغلی دی. دغه هیواد ټول هغه مهاجر چې د کوچنیو بیړیو په واسطه ورته د رسیدو هڅه کوي، نیسي او د الکاهل په سمندر کې پرتو ټاپو گانو، لکه نائورو او پاپوا گینه ته یې استوي. هغوی تر هغه وخته پوري هلته ساتل کیږي چې د پناه پرغوښتنه يې غور کيږي.

د بشري حقونو مدافعین په دغو کمپونو کې د مهاجرو د ناخوال وضعیت له امله چې یو ډول بشري ناورین ته ورته حالت لري، د آسترالیا پر حکومت وخت په وخت نیوکي کوي. هغوی وايي چې مهاجر په دغو کمپونو کې تجرید شوي دي او په ناهیلۍ کې ژوند کوي. هغوی د مهاجرو په مینځ کې د ډول ډول، خصوصاً رواني ناروغیو د زیاتیدو رپوټ ورکوي، څرنگه چې ځیني يې حتی د ځان وژني هڅي کوي.

د تیر کال د اکتوبر مياشتي په نیمايي کې د آسترالیا د طبیبانو یوې اتحاديې له حکومت څخه وغوښتل چې ۸۰ تنه کم سنه مهاجر چې په زور دغو کمپونو ته لیږل شوي دي، د آسترالیا خاروي دننې ته یې انتقال کړي.

د نوموړي اتحاديې یوه ویاند، پاول باورت ویلي دي چې د دغو کوچنيانو ډير يې د ویري او ډار له ناروغۍ سره لاس او گریوان دي او باید ژر تر ژره يې درملنه وشي.

هغه یادونه کوي چې دا چې د دغو کوچنيانو څخه کوم یوه یې لا تر اوسه پوره خپل ژوند له لاسه نه دی ورکړی، یوه معجزه ده. په هغه وخت کې د آستراليا کابو ۶ زرو طبیبانو د دغه هیواد صدراعظم، سکات موریسون ته یو لیک واستاوه چې حکومت باید د مهاجرو پر وړاندي په خپل سخت سیاست کې بدلون رامنځ ته کړي.

په جنوري میاشت کې آسترالیا د مهاجرو دوه کمپونه چې سخت امنيتي تدابیر ورته نيول شوي ول، وتړل. حکومت د د دغه اقدام له پاره د هغه د خپلې وینا له مخې د «سرحدونو د ساتلو له پاره د عملیاتو مثبت نتایج وگڼل». د آسترالیا د مهاجرو د چارو وزیر، داوید کولمان، وویل چې گواکې هغوی بریالی شول چې د مهاجرت په برخه کې د بې نظمۍ  مخه ونیسي، هغه څه چې په پخواني حکومت کې رامنځ ته شوې وه.

هغه وویل چې د غیر قانوني مهاجرت د بهیر مخه نیول شوې ده. د هغه د وینا له مخې په نتیجه کې د مهاجرو ۱۹ هغه کمپونه چې دير ټینگ امنيتي تدابیر يې درلودل، وتړل شول.

له ۲۰۱۳م کال راهيسي هغه مهاجر چې د سمندر له لاري آسترالیا ته د رسیدو هڅه کوي، تر نیول کیدو وروسته په الکاهل سمندر کې د نائورو ټاپو جمهوریت او یا د مانوس ټاپو چې په پاپواگینه پوري اړه لري، لیږدول کیږي.

له هغه وخت راهيسي یوازي د نائورو کمپ ته ۲۲۰ کم سنه مهاجر استول شوي دي. تیرکال د خلکو په مینځ کې تر سختو اعتراضونو وروسته حکومت مجبوره شو چې هغه مهاجر چې خپل قانوني سن ته نه دي رسېدلي له نوموړي ټاپو څخه وباسي.

زموږ له ارشيف څخه:

پخوانی زندان اوسنی مهاجر کمپ

یو کټ، دوې چوکۍ او د موسیقۍ یو کیبورډ

دوی له افغانستان څخه راغلي دي. ۲۷ کلن حامد کریمي او د هغه ۲۵ کلنه میرمن فرشته راحیمي د هالنډ په هارلیم کې د زندان په کوټه کې اوسیږي. له دغه زندان څخه نور د زندان په توگه نه، بلکې د مهاجرو د استوگنځای په توگه کار اخیستل کیږي. هغه کیبورډ غږوي او موسیقي اوري. موسیقي، جگړه نه. خو دا چې هغوی به په اروپا کې پاته شي او که نه، معلومه نه ده.

پخوانی زندان اوسنی مهاجر کمپ

د دروازې تر څنگ بله دروازه او وړاندې لږه رڼا

د هالنډ په هارلیم کې په لومړي نظر کې زندان دغه ډول ښکاري. څو سوه مهاجر دغه ځای ته د اوسیدو له پاره راوستل شوي دي. له هغوی څخه یو تن ايرانی ۲۵ کلن رضا احسان دی.

پخوانی زندان اوسنی مهاجر کمپ

یو زندان، زندان وي

که څه هم دغه ودانۍ د یادگاري میراث برخه ده او په دغه ځای کې د خلکو ښه پالنه کیږي، خو یو زندان یوازې زندان وي. دغه څه په انځور کې هم صدق کوي. پر دې سربیره په انځور کې کیڼ اړخ ته ۳۶ کلن محمد بن سلیم چې له الجزایره راغلی او ۲۲ کلن امیني اوشي چې د لیبیا هیواد ده هم لیدل کیږي.

پخوانی زندان اوسنی مهاجر کمپ

د کوټې په خوله کې یو پیاله چای

افغان مهاجر سیرت الله حیات الله د یوې کوټې یا سلول مخې ته چای څښي.

پخوانی زندان اوسنی مهاجر کمپ

له سوماليا څخه هارلیم ته

یوازې ښځې، په یوه جلا برخه کې دي. د اسوشیتد پرس عکاس د یوې سومالیایي ښځې انځور اخیستی دی. ایاوا محمد ۴۱ کلنه ده او دلته د نورو ډېرو میرمنو په شان یوې نامعلومې راتلونکې په انتظار ده. هغې په خپل ټاټوبي کې تاوتریخوالی تر خپل شا پریښی دی.

پخوانی زندان اوسنی مهاجر کمپ

افغانستان، سومالیا، عراق...

د هالنډ په پخواني زندان کې کوچنۍ نړۍ هغه څه ښيي، چې په اروپا کې د «کډوالو د کړکیچ» په نامه یادیږي. د نړۍ د کړکیچ ځپلو سیمو خلک په دغه ځای کې اوسیږي. ۲۴ کلن یاسر حاجي او د هغه ۱۸ کلنه میرمن له عراق څخه راغلي دي.

پخوانی زندان اوسنی مهاجر کمپ

د کالو پریمنځلو ځای

مهاجر دلته بیا هم په منظمه نړۍ کې ژوند کوي. جگړه، گډوډي او غیر منظموالی نه شته، بلکې برعکس د کالو پریمنځلو یو سالون چې زیاترو یې په خپل هیواد کې ترې استفاده نه کوله.

پخوانی زندان اوسنی مهاجر کمپ

د تعقیب پای؟

دغه کس نه غواړي چې نوم وښيي او نه یې پوره څیره ولیدل شي. د هغه دلیل هم جنس بازي ده. هغه مراکشی دی.

پخوانی زندان اوسنی مهاجر کمپ

عبادت کول

فاطمه حسین چې ۶۵ کاله عمر لري په دغه کمپ کې یوه له هغو زیات عمر لرونکو مهاجرو څخه ده چې د اسوشیتد پرس عکاس پیژندلې ده. هغې عکاس ته د خپلې کوټې د لیدو اجازه ورکړې او آن د دې اجازه چې د لمانځه پر مهال یې انځور واخلي. هغه د عراق ده.

پخوانی زندان اوسنی مهاجر کمپ

سپورت

۴۰ کلن ناران بتر، له منگلویا څخه راغلی دی. هغه د باسکټبال لوبه کوي. د دغه سرپنا اداره کوونکي او پالونکي د انسانانو آزاد ژوند ته د مخه کولو هڅه کوي.

موږ تعقيب کړئ