آلمان ـ د شري پر موضوع ښايي بعضي والدين جريمه سي
۱۳۹۶ خرداد ۷, یکشنبه
آلمان غواړي چې په هیواد کې په والدینو فشار نور هم زیات کړي. دا په دې معنی چې په دې هیواد کې والدین اړ دي چې خپل ماشومان د بیلابیلو ناروغیو پر وړاندې واکسین کړي. په دې وروستیو کې آلمان د سرخکان يا شري ناروغۍ د ډیریدو شاهد وو. دغه تازه قانون د آلمان د روغتیا د وزیر، هیرمن ګروهې لخوا د دې هیواد پارلمان ته وړاندیز شوی دی او ټاکل شوې چې دغه نوی قانون به د بحث له پاره د روانې اونۍ د پنجشنبې په ورځ د دې هیواد د پارلمان مشرانو جرګې ته ورسیږي.
د آلمان د پارلمان مشرانو جرګې یا بوندیز رات پر دې وړاندیز شوي قانون له وړاندې نه نیوکې کړي او وايي چې په دې کار سره د والدینو او د ماشومانو د روغتیايي مرکزونو ترمنځ واټن به لا ډیر شي.
تر اوسه دا د ماشومانو په روغتیايي مرکزونو پورې اړه درلوده چې روغتیايي چارواکو ته د داسې والدینو په هکله د خبر ورکولو پریکړه وکړي چې د خپلو ماشومانو د واکسین کولو لارښوونې نه عملي کوي. خو د نوي قانون په اساس دوی اړ دي چې په دې صورت کې حکومتي چارواکو ته خبر ورکړي. که چیرته والدین د واکسین دغه لارښوونې عملي نه کړي، نو د آلمان د قانون په اساس به تر ۲۵۰۰ یورو جریمه ادأ کوي.
دغه اقدام په داسې حال کې اخیستل کيږي چې روان کال په آلمان کې د سرخکان پیښې په بې سارې توګه ډیرې شوي دي. د شمیرو له مخې په آلمان کې د روان کال د اپریل میاشتې تر پایه پورې ۵۸۳ د سرخکان پیښې ثبت شوي په داسې حال کې چې د تیر کال په ۱۲ میاشتو کې د سرخکان ۳۲۵ پیښې ثبت شوې وې.
د یادولو وړ ده چې د سرخکان زیاتره پیښې د آلمان د نورد راین ویستفالن په ایالت کې رامنځته شوي دي چې شمیر یې د مې میاشتې تر نیمايي پورې ۳۸۱ پیښو ته رسیږي. دغه شمیر بیا د تیر کال په ټولو ۱۲ میاشتو کې ۲۸ پیښې وو.
روان کال د سرخکان د ناروغۍ له امله د آلمان د ایسن په ښار کې یوې ۳۷ کلنې میرمنې خپل ژوند له لاسه ورکړی دی.
پر ورته موضوع یو انځوريز البوم زموږ له آرشيف څخه (15.05.2017):