آلمان ـ د ټولو افغان مهاجرو فيصلې وځنډول سوې

و افغانستان ته د رد سوو پناه غوښتونکولېږد په آلمان کي د زیات وخت راهيسي شخړيزه موضوع ده. اوس اړونده اداره د برلين نوي فيصلې ته انتظار باسي.

د مهاجرو او پناه غوښتونکو له پاره د آلمان فدرالي ادارې BAMF د افغان پناه غوښتونکو د پناه غوښتنې فيصلې متوقفي کړي دي. په آلمان کي د «فُنکه» په نوم د رسنيو ډلې راپور ورکړی چي ياده فدرالي ادارې په کابل کي د وروستي بريدونو وروسته دغه فيصله کړې ده او دې ته انتظار باسي چي د افغانستان د امنيت په تړاو د نوي ارزونې تنايج برسېره سي.

دا په داسی حال کي ده چي د آلمان حکومت تر اوسه دا استدلال کاوه چي په افغانستان کي امن سيمي موجودي دي، او دا چي و افغانستان ته د رد سوو مهاجرو لېږد غېرمسؤلانه کار نه دی. خو د مهاجرو د ملاتړ سازمانونو او په همدې راز د آلمان په پارلمان کي د اپوزيسيون ګوندونو د افغان مهاجرو لېږد د افغانستان امنيتي وضعې ته په کتو سره ناسم کار بولي.

د رسنيو د راپور له مخي د BAMF ادارې د افغان پناه غوښتونکو د پناه غوښتنې د دوسيو ځنډول کېدنه تائيد کړې ده. يادي ادارې ويلي دي چي د فيصلو پروسه يې :«په هغه تناظر کي ځنډولې چي د بهرنيو چارو وزارت ژمنه کړې چي د افغانستان د امنيتي وضعې په تړاو نوې ارزونه به ژر» وړاندي کړل سي. خو دا چي د آلمان د بهرنيو چارو وزارت به د افغانستان د امنیتي وضعې په تړاو کله خپله نوې ارزونه وړاندي کړي، لا نه ده معلومه.

حتمي فيصله

د رسنيو د یادي ډلې په راپور کي راغلي دي چي د کډوالۍ اداره به د دې وروسته هم نه یوازي دا چي له افغانانو څخه د پناه غوښتنې لومړۍ عريضې بلکه ورپسې عريضې هم مني. البته د دغو دوسيو حتمي فيصلې به تر هغه وخته ځنډېلي وي، تر څو چي د افغانستان د امنيتي وضعې په تړاو د آلمان حکومت نوې ارزونه نه وي وړاندي کړې. هغه افغان پناه غوښتونکي چي لا تر اوسه يې مرکې نه دي سوي له هغوی څخه به د مرکو اخيستلو لړي هم ادامه ولري.

د کډوالۍ د ادارې وياندي ويلي دي چي د افغان پناه غوښتونکو د پناه غوښتنو فيصلې د لنډي مودې له پاره ځنډول سوي او نه د پناه غوښتنې د قانون د ۱۱مې مادي له مخي د اوږدې مودې له پاره.

که چا تېرايستنه کړې وي

د افغان پناه غوښتونکو د دوسيو د فيصلو مؤقتي درول کېدل په داسي حال کي په رسنيو کي موضوع ګرځېدلې چي د دې وروسته هم افغانستان ته د جرم مرتکب سوو افغان مهاجرو او تېرايستونکو لېږد امکان لري. د رسنيو د راپورونو له مخي د کډوالۍ اداره به د هغو افغانانو د دوسيو پرېکړي نه ودروي چي د خپل هويت په تړاو يې غلط معلومات ورکړي وي.

د BAMF په وينا د ۲۰۱۷ کال د می مياشتي تر پای پوري د افغان پناه غوښتونکو ۲۹۴۹۸ دوسيې دې ته په انتظار وې چي پرېکړه يې وسي. زياته سوې چي د می په ۳۱مه نېټه ۱۴۳۱۲ داسي افغانان په آلمان کي ول چي بېرته خپل هيواد ته په ستنېدو مکلف سوي ول. خو له ياد شمېر څخه ۱۰۲۴۰ داسي کسان ول چي د دولدونګ په نوم سند يې درلود چي دغه کسان نه سوای اخراج کېدلای.

پر ورته موضوع یو انځوريز البوم زموږ له آرشيف څخه (27.01.2017):

کوم دلايل په آلمان کي د پناه غوښتنې د قبولۍ سبب ګرځي؟

قبولي د تعريف په ړنا کي

د پناه غوښتنې د قبولیدو لپاره اساس، د آلمان د اساسي قانون د ۱۶ الف مادې (Art. 16a GG)، او د پناه غوښتنې د قانون د دريمي مادې د لومړي بند (Art. 16a GG§ 3) له مخې د مهاجرو په هکله د ژنیف د منشور (GFK) تعریف دی. دا چې د دغه قانون (§ 3 Abs. 1AsylG) له مخې دغه تعریف څه ډول دی، په راتلونکي انځور کي لوستلای سئ: nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

پناه غوښتونکی هغه څوک دی:

« چې د خپل نژاد، دین، ملیت، سياسي مفکورې او يا د ځانګړي ټولنيزي ډلې سره د تړاو له کبله د خپل هغه هيواد څخه بهر وي، چي تابعيت يې لري يا يې هلته د نه تابیعت لرونکی وگړي په توګه ژوند کاوه، خو د تعقيب څخه د ځان ساتنې له پاره د دغه هيواد حفاظت نه سي تر لاسه کولای يا د تعقيب له بيري د دغه حق غوښتنه کول نه غواړي.» قانون: (§ 3 Abs. 1AsylG)

کوم دلايل په آلمان کي د پناه غوښتنې د قبولۍ سبب ګرځي؟

د ردېدنې دلايل ـ ټولو ته ورپېښه ستونزه

د کډوالو او پناه غوښتونکو له پاره فدرالي اداره په زياتو مواردو کي د پناه غوښتنې ردېدنه په دې توجيه کوي چي گواکې پناه غوښتونکي ته د پورتنیو دلایلو له امله ځير شوي گواښونه، یواځي هغه ته نه، بلکه د دغه هيواد ټولو وګړو ته متوجه دي. معنی دا چې: هر پناه غوښتونکی باید خپله ثابته کړي چې دغه ډول گواښونه یواځي ده ته متوجه دي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

د ردېدنې دلايل ـ د زيات وخت تېرېدنه

د هغو دلایلو چې یو پناه غوښتونکی پرې تکیه کوي او له خپل هیواد څخه د تیښتې ترمنځ باید داخلي تړاو موجود وي. معنی داچې: نوموړي دلایل باید د تیښتې سبب شوي وي. که د تعقيب او د تېښتي يا هجرت تر منځ زيات وخت تېر سوی وي، نو د هجرت کولو دلايل نور نه منل کيږي، او پناه غوښتنه رديږي.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

د ردېدنې دلايل ـ په خپل هيواد کي نوري امن سيمي

د قبولۍ له پاره د مهاجر په ټول هيواد کي د تعقيب د ګواښ موجوديت شرط دی. که په هيواد کي داسي امن سيمه موجوده وي چي پکښي پناه غوښتونکی له تعقيب څخه ځان خوندي کولای سي، نو بيا له مهاجره غوښتل کيږي چي د خپل هيواد دننه خوندي سيمي ته دي هجرت وکړي. د (BAMF) اداره او اړونده آلمانۍ محکمې مکلفه دي چي د امن سيمو په تړاو تازه معلومات د بېلګي په توګه له UNHCR څخه ترلاسه کړي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

د ردېدنې پخوانی دليل ـ د دولتي تعقيب نه موجوديت

تر ۲۰۰۵ کال پوري يوازي د هغه چا د پناه غوښتنه قبولېدله چي د يو دولت له خوا تر تعقيب لاندي به ؤ. خو اوس د (§ 3c AsylG) مادې له مخي دغسی تعقیب کیدای سي چې د نورو، دبیلگې په توگه (وسلوالې ډلې) له خوا هم د پناه غوښتنی دلیل وگرځي، البته په دی شرط چې واکمن دولت تر تعقیب لاندې شخص ساتلی نه شي او یا یې ساتل نه غواړي. (§3d AsylG) کيدلای سي.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

د پناه غوښتنې دلايل

په راتلونکو انځورونو کي ځیني هغه مهم دلایل او لاملونو څخه لوستلای سئ، چي د پناه غوښتونکي يې د پناه غوښتنې پر وخت د خپل مهاجرت د استدلال له پاره کاروي. په دې تړاو هم معلومات لوستلای سئ چي ايا دغه دلايل په عمومي توګه د پناه غوښتونکي په توګه د قبولېدو سبب ګرځي او که څنګه.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

حقيقي ګواښ که صرف بيره؟

تعقيب بايد ښکاره، څرګند، منطقي، د فهم وړ او په لوی احتمال ممکن وي. زيات وخت پناه غوښتونکې په دې توجيه هم رديږي چي ګواکي «تاسو د تعقيب لاندي راتللو بيره درلوده، خو په حقيقت کي تر لاندي نه ياست راغلي.» مهاجرو ته دا هم ويل کيږي چي ګواکي تاسو د خپل دولت له چارواکو مرسته غوښتلای سوای. زياتره وختونه دا هغو مهاجرو ته ويل کيږي چي وايي له قومي ډلې يا مافيايي ډلې تښتېدلي دي.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

له دولتي کسانو او ادارو څخه بيره

د زياتو هغو پناه غوښتونکو د پناه غوښتنه هم په زیاتو مواردو کي ردېدلای سي، څوک چي وايي له دولتي کسانو يا ادارو له خوا تر تعقيب لاندي راتلو بيره يې لرله خو ورته لا زيان نه وي رسېدلی. د بېلګي په توګه د دغه کس پناه غوښتنه په دې دليل ردېدلای سي چي ګواکي د پناه غوښتونکي د هيواد حکومت د بشري حقونو د ساتلو په کوښښ او په ساتلو مکلف دی او عموما د دې توان هم لري.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

عملا تر تعقیب لاندي راتلل

هغه پناه غوښتونکی د قبولېدو زيات چانس لري چي تر مخه لا په عملي توګه تر تعقيب لاندي راغلی وي. د (BAMF) اداره په داسي صورت کي دې نتيجې ته رسيږي چي که پناه غوښتونکی خپل هيواد ته ولېږل سي، نو احتمال سته چي بيا به ورسره تر تعقيب لاندي راتلو ستونزه تکرار سي او له دې کبله پناه غوښتنه قبولوي. هغه وخت هم قبولي ممکنه ده چي د هجرت څخه دستي مخکي تعقيب رامنځ ته کيدونکی ؤ.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

پخوا پای ته رسېدلی تعقيب

تعقيب چي پخوا لا پای ته رسېدلی وي، د قبولۍ سبب نه ګرځي. د بېلګي په توګه که يو څوک حتی څو کاله بندي سوي وي او سزا يې پای ته رسېدلې وي، نو ښايي په دې دليل يې پناه غوښتنه رد سي چي تعقيب په ماضي کي موجود ؤ خو نور پای ته رسېدلی او د بيا تکرار اشد ګواښ يې نه دی موجود. د يو څو ورځو بندي کېدنه او وهل کېدل په زیاتو مواردو کي ډېر جدي تعقيب او په دې توګه د قبولۍ دلیل نه بلل کيږي.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

ګواښ و ژوند او آزادۍ ته

د يو کس ژوند او آزادۍ ته ګواښ صرف په هغه صورت کي د قبولۍ سبب ګرځېدلای سي، چي پناه غوښتونکي ته د هغه د سياسي مفکورې، دين، نژاد يا بلې ټولنيزي ډلې سره د تړاو له کبله دوامداره او جدي ورپېښ وي. خو دغه ګواښ هم تل د قبولۍ ضامن کیدای نه سي. د بند د سزا گواښ، د بیلگې په توگه، کیدای سي په دی دلیل رد سي چې گواکې د مهاجر اړوند دولت د خپل دولتي گټو د ساتني له امله، د بندي کولو حق لري.nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

(کورنۍ) جګړه

په عمومي توګه جګړې يا کورنۍ جګړې په آلمان کي د پناه غوښتونکي په توګه د قبوليدو يا د ورته حفاظت ترلاسه کولو دليل نه ګرځي. خو که د جګړې تر څنګ په ځانګړې توګه يو شخص ته مستقيم، فردي او ثابت سوی د تعقيب ګواښ موجود وي، قبولي ممکنه ده. خو جګړه او کورنۍ جګړه د اخراج د نه عملي کېدو يا ځنډولو سبب کيدلای سي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

له جنګي ماموريته انکار

د آلمانۍ محکمو د زياتو فيصلو له مخي يوازي په جګړه کي د عسکر په توګه د جنګېدو څخه انکار يا له جګړې څخه لاس اخيستنه د قبولۍ سبب نه ګرځي، خو هغه وخت سبب ګرځېدلای سي چي له دغه انکار له کبله جزا يې ډېره جدي وي. په جګړه کي د ګډون څخه انکار هله د قبولۍ سبب کېدای سي چي دغه کس و جنايتونو، جنګي جنايتونو (لکه د ملکيانو وژنه) يا د بشريت ضد جنايتونو ته هڅول سوی خو هغه انکار کړی وي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

غربت او افلاس

په اصطلاح «عمومي» ستونزي لکه قحطي، غربت، افلاس او طبعي فاجعې د پناه غوښتونکي په توګه د قبولېدو سبب نه سي ګرځېدلای. هغه پناه غوښتونکی چي صرف په خپل هيواد کي د بې وزلې او مادي غربت د شتون له کبله د مهاجرت خبره کوي، په لوی احتمال به قبول نه سي. خو غربت او ورته ستونزې په ځانګړو مواردو کي د اخراج د عملي کېدو د مخنيوي لامل کيدلای سي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

د مېرمنو تعقيب

مېرمني او انجونې چي په خپل هيواد کي د جنسي تاوتريخوالي قرباني سوي وي يا يې د قرباني کيدو حتمي بيره ولري، امکان يې سته چي د پناه غوښتونکو په توګه قبولي سي. خو بعضي وخت د دغو مېرمنو پناه غوښتنه په دې دليل هم رديږي چي په دغه هيواد کي هره مېرمنه له دغه ګواښ سره مخامخ نه ده او دغه مېرمنه د ځان ژغورلو نو امکانات لري. عموما جنسي تېری صرف په استثنيي مواردو کي د قبولۍ سبب ګرځېدلای سي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

دين

زيات وختونه هغه پناه غوښتونکي چي ويل به يې د خپل دين له کبله تر تعقيب لاندي دي، په دې دليل ردېدل چي گواکې کولای سوای چې خپل دیني عقاید پټ وساتي او په عامه توگه بربڼد نه کړي. خو نوې اروپايي حقوقي تگلاره وايي چي انسانان بايد په ښکاره د خپل دين د عملي کولو حق ولري. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

همجنسبازي

د ښځینه او یا نارینه و همجنسبازانو تعقیب د پناه غوښتنې یو دلیل کیدای سي. خو په ټولنه کې یواځې د همجنسبازې په وړاندې تبعیض کفایت نه کوي. خو پناه غوښتنه په دې دليل ردېدلای هم سي چي همجنسباز پناه غوښتونکي کولای سوای په خپل هيواد کي خپل تمايل پټ وساتي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

په جنايت تورن کسان نه قبوليږي

هغه کسان چي د جنايت له کبله درې کاله بندي سوي وي، د آلمان امنیت او یا عامه امنیت ته ګواښ وي يا ورباندي د بشري حقونو د تر پښو لاندي کولو يا د جنګي جنايتونو تر سره کولو شک وي، د پناه غوښتونکي په توګه نه قبوليږي. وعامه امنیت ته د نورو جرایمو د ارتکاب تر څنگ، هغه څوک هم ګواښ بلل کيدلای سي چي جنسي تیری يا جنسي ځورونه یې کړې وي او د دې جرم له امله په يو کال بند محکوم سوی وي. nds-fluerat.org

کوم دلايل په آلمان کي د پناه غوښتنې د قبولۍ سبب ګرځي؟

عدم مسؤليت

د دغه راپور ليکونکی په دغه انځوريز راپور کي د راټولو سوو معلوماتو د بشپړوالي، کاملتوب او تازه والي ادعا نه لري او له کبله يې له هر ډول مسؤليت څخه بري دی. دغه معلومات د مسلکي وکيل او حقوقپوه سره د حقوقي او قانوني مشورې ځای هم نسي نيولای. دغه معلومات د BAMF.DE او د nds-fluerat.org پاڼو څخه د ۲۰۱۷ کال د جنورۍ په ۲۶مه نېټه اخيستل سوي دي.


 

موږ تعقيب کړئ