آلمان مهاجرو ته د بيرته تگ په بدل کي څومره پيسې ورکوي؟

د آلمان حکومت د هغو مهاجرو له پاره چې په خپله خوښه بیرته خپلو هیوادونو ته ګرځي، د مالي مرستو د ورکړې وړاندیز کړی. خو پوښتنه دا ده چې دغه مالي مرسته څومره او چا ته ورکول کیږي؟

د آلمان حکومت له کلونو راهیسې هغو مهاجرو ته چې له آلمان څخه بیرته خپلو هیوادونو ته په رضا کارانه توګه د تګ له پاره چمتو شي، یو مقدار مالي مرستي ورکوي. د دې ترڅنګ د آلمان د کورنیو چارو وزیر توماس دیمیزیر د روانې میاشتې په ترڅ کې د دې مالي مرستو د ډیرښت خبر ورکړ.

د آلمان د کورنیو چارو وزیر توماس دیمیزیر په حواله، هغه مهاجر چې د ژوندانه د ستونزو له امله آلمان ته راغلي وي، دوی ته به خپلو هیوادونو ته په خپله خوښه د تګ په صورت کې مالي مرستې ورکړل شي ترڅو دوی په خپلو ټاټوبو کې ځای پر ځای شي او خپل ژوند ته ادامه ورکړي.

د «ستاسو هیواد، ستاسو راتلونکي» ترنامه لاندي دغه وړاندیز د درو میاشتو له پاره دی او ټاکل شوې چې د راتلونکې نوي عیسوي کال په فبروري میاشت کې به بیرته پای ته ورسیږي.

د دې پروګرام په چوکاټ کې که یو مهاجر وغواړي په خپله خوښه بیرته خپل اصلي هیواد ته ولاړ شي، په دې صورت کې تر۲۲۰۰ یورو پورې مالي مرستې ورکول کیږي.

تر دې مخکي دغه راز مالي مرستي ۱۲۰۰ یورو وې. په دې ترتیب که یوه کورنۍ چې د کورنۍ د غړو شمیر یې درې کسان وي او دوی وغواړي چې د دې پروګرام په چوکاټ کې بیرته خپل هیواد ته وګرځي، نو په دې صورت کې دوی ته نږدې ۶ زره یورو مالي مرسته ورکول کیږي.

د توماس دیمیزیر په حواله «که چیري تاسې د فبروري میاشتې تر پایه پورې خپل هیواد ته د بیرته ګرځیدو پریکړه وکړه، نو تاسې په خپل هیواد کې د لومړي کال له پاره د ژوند کولو د ستونزو په حل کې مرسته ترلاسه کولی شئ.»

د علي په نامه یو مهاجر د آلمان په هاګن ښار کې له خپلې میرمنې او څلورو ماشومانو سره ګډ ژوند کوي. د علي په حواله دغه وړاندیز یوازې د هغو مهاجرو له پاره د منلو دی چې په آلمان کې د پاتېدو هیڅ هیله ونه لري.

هغه وايي: «د شرقي اروپا او افریقايي هیوادونو ډېر داسې مهاجر دي چې دوی په دې خبر دي چې د دوی د پناه غوښتنه به [په آلمان کې] رد شي او دوی به له دې هیواد نه اخراج ته اړ شي.»

dpa,epa(K.H/N.Z)

زموږ له ارشيف څخه:

د کوم مسلک خلک په آلمان کې ژر کار ترلاسه کولی شي؟

داکتر

په دې څانګه کې کار د مقرراتو پر بنسټ تنظیم شوی یعني په دې برخه کې د پوهې سطحه باید د آلماني معیارونو سره برابر وي. هغه داکتران چې له اروپایې اتحادیې څخه بهر آلمان ته راغلي دي په دې هیواد کې د کار له پاره باید اجازتنامه ترلاسه کړي. دغه اجازتنامه کیدای شي موقتي او یوازې په هغه ایالت کې اعتبار ولري چې دغه اجازتنامه یې ورکړې. بله نا محدوده اجازتنامه ده چې د هغې ترلاسه کولو له پاره باید امتحان ورکړي.

د کوم مسلک خلک په آلمان کې ژر کار ترلاسه کولی شي؟

نرس

په دې رشته کي سړی کولی شي یوازې د ایالتي ادارو له اجازتنامې سره کار وکړي، خو د یوې ازموینې ورکول اړين دي. یو شمیر درسي پروګرامونه او کاري تجربي د جبران وړ دي، خو که چیرې دغه توپير ډیر زیات وي بیا نو باید یوه تخصصي آزمونه ورکړي او یا هم یوه دری کلنه روزنیزه دوره بشپړه کړي. نرسان یا نرسانې هم باید په روزمره ژوند کې کاریدونکي آلماني او طبي اصطلاحاتو سره آشنایې ولري.

د کوم مسلک خلک په آلمان کې ژر کار ترلاسه کولی شي؟

انجینر

په آلمان کې د انجینر په توګه د کار کولو له پاره حتمي نه ده چې د دغه شخص د انجینرۍ خارجي دیپلوم دې په رسمیت پیژندل شوی وي. کار ورکونکی شرکت په خپله پریکړه کوي چې آیا نوموړی شخص چې د کار ترلاسه کولو غوښتنه یې کړې یو مناسب کس دی او که څنګه؟ په عین وخت کې د یوه مسلک په برخه کې تخصص د کار په بازار کې جانس زیاتوي.

د کوم مسلک خلک په آلمان کې ژر کار ترلاسه کولی شي؟

د کمپوټر متخصص

د دې مسلک له پاره تر اوسه بورې خاص قوانین نه دي وضعه شوي. د یوه کاري ځای د موجودیت په صورت کې هر څوک چې ځان مناسب بولي خپل غوښتنلیک دي واستوي. د ۲۰۱۶ کال د احصایو له مخې په دې برخه کې متخصصیونو ته تقاضا ډیره شوی ده.

د کوم مسلک خلک په آلمان کې ژر کار ترلاسه کولی شي؟

د حرفوي زده کړو متخصصین

د ۳۰۱۳ م کال را په دیخوا د آلمان د کار د چارو وزارت په آلماني شرکتونو کې د مسلکي کارګرانو له پاره شرایط آسانه کړي دي. د هغو شمیرو له مخې چې د ۲۰۱۶ م کال په سپټمبر میاشت کې اخیستل شوي دي مسلکي بهرنیان تر ټولو زیات د فلزکارۍ، د پرزو نصبولو، د برښنا ټکنالوژۍ، پایپ جوړونې، چت جوړونې او نورو ساختماني برخو کې له دغو آسانتیاو څخه ګټه اخیستې ده.

د کوم مسلک خلک په آلمان کې ژر کار ترلاسه کولی شي؟

تحصیل یافته متخصصین

د دې رشتو متخصصین باید په آلماني ژبه پوه اوسي او په خپله رشته کي یې لوړی زده کړې کړي وي. که څه هم د دوی د تحصیلي اسنادو تائید حتمي نه دی خو د کار په چارو کې د آلمان فدرالي اداره سپارښتنه کوي چې د بهرنیانیو متخصصینو دیپلومونه باید له آلماني معیارونو سره سم وي. دغه اسناد د سوداګرۍ او صنایعو ادارې له خوا ارزول کیږي او شاوخوا دری میاشتې وخت نیسي.

د کوم مسلک خلک په آلمان کې ژر کار ترلاسه کولی شي؟

کوم ځای ته باید مراجعه وشي؟

پر دې د پوهیدلو له پاره چې آیا ستاسي دیپلوم چي له آلمان څخه مو بهر اخیستې دی په رسمیت پيژندل کیدو ته اړتیا شته او که نه، د دې انټرنټي ادرس www.anerkennung-in-deutschland.de دې برخې Anerkennungsfinder ته مراجعه وکړئ. همدارنګه په دې ادرس کې هغه آژانسونه موندلی شئ چې ستاسي اسناد ارزوي.

موږ تعقيب کړئ