آلمان پر مهاجرینو ۲۰ میلیارده یورو مصرف کړي دي

د دې پیسو څلورمه برخه پر داسې پناه غوښتونکو مصرف شوې چې لا اوس هم تر ارزونې لاندې دي او له نیمايي څخه ډیرې پیسې بیا د اجباري مهاجرت د ریښو پر لمنځه وړلو مصرف شوي دي.

په ۲۰۱۶م کال کې د آلمان حکومت خپلو ۱۶ ایالتونو ته له مهاجرینو سره د مرستې په موخه ۹،۳ میلیارده یورو بودیجه په اختیار کې ورکړې وه. په عین وخت کې په بهرنیو هیوادونو کې د اجباري مهاجرت د ریښو د لمنځه وړلو له پاره آلمان ۱۱ میلیارده یورو مصرف کړي دي.

دغه شمیرې د آلمان د فدرالي حکومت لخوا په یوه تازه رپوټ کې خپرې شوي دي چې ټاکل شوې د آلمان د صدراعظمې انګلا مرکل تر تایید وروسته به خپور شي.

له دې پیسو څخه ۵،۵ میلیارده یورو په داسې مهاجرینو مصرف شوي چې په آلمان کې یې د پناه غوښتنه کړې او تر اوسه پورې د آلمان د یو ایالت لخوا د مهاجر په توګه نه دی منل شوی. په دې بودیجه کې په آلمان کې د مهاجرینو د ښه ادغام په موخه هم د ۲ میلیارده یورو د لګښت یادونه شوې. سربیره پر دې له دې پیسو څخه ۴۰۰ میلیونه یورو د مهاجرینو او پناه غوښتونکو پر سرپناه او ۳۵۰ میلیونه یورو د کم عمره او له سرپرست پرته پر مهاجرینو مصرف شوي دي.

د آلمان د نورد راین ویست فالن ایالت د دې پیسو تر ټولو ډیره برخه یعنې ۱،۲ میلیارده یورو ترلاسه کړي. بایرن د ۸۶۰ میلیونه یورو په ترلاسه کولو په دوهم ځای کې دی او بیا بادن وتمبرګ د ۷۲۸ میلیونو یورو په ترلاسه کولو سره په دریم مقام کې ځای لري.

په عین وخت کې د مهاجرینو په هکله د عام آلمانیانو نظر تر ډیره مثبت پاتې دی. د ټولو پوښتل شوو آلمانیانو کابو ۴۰ سلنه وايي چې دوی ډیر ډاډه وو چې آلمان به د مهاجرت له امله رامنځته شوې ننګونې حل کړي.

د اجباري مهاجرت له لاملونو سره مبارزه

د آلمان د ماليې فدرال وزارت اعلان کړی چې ۱۱ میلیارده یورو په مستقیمه توګه د اجباري مهاجرت او د بې ځایه کیدو د لاملونو د لمنځه وړلو له پاره مصرف شوي دي. د انګلا مرکل د دفتر د مشر، پیټر التمایر په دې هکله ویلي چې دغه هڅې محسوسې پایلې هم لري.

التمایر له آلمانۍ ورځپاڼې راینیشه پوست سره په مرکه کې ویلي چې «په تیر کال کې له یونان او ترکیې څخه د مهاجرینو په راتګ کې د پام وړ لږوالی رامنځته شوی او د لیبیا او ایټالیا په لار هم د مهاجرینو په راتګ کې کمښت راغلی.» نوموړی زیاتوي چې په لیبیا، نیجر او مالي کې د حالت د ښه والي له پاره زموږ تعهد اوس ښه نتیجه ورکړې.

آلمان د نړۍ په ځینو هیوادونو کې خپل پوځ ګمارلی دی ترڅو د انساني قاچاق شبکې له منځه یوسي او د اسلامپاله ډلو پر وړاندې د جګړې ملاتړ وکړي.

په عین وخت کې د آلمان صدراعظمې انګلا مرکل د بیلګې په توګه د رد شوو پناه غوښتونکو له آلمان څخه د ژر تر ژره ایستلو غوښتنه کړې. سربیره پر دې، تیره اونۍ آلمان نوي داسې قوانین تایید کړل چې له مخې یې اوس د آلمان چارواکي کولای شي رد شوي مهاجرین په دوامداره او چټګ ډول اخراج کړي. په عین وخت کې د آلمان د مهاجرت او پناه غوښتنې ادارې یا «بامف» ته هم ډیر واک ورکړل شوی او اوس کولای شي چې مهاجرین تر څار لاندې ونیسي او د دوی بریښنايي شخصي وسایلو ته لاس رسۍ ولري.

پر ورته موضوع یو انځوريز البوم زموږ له آرشيف څخه (10.12.2016):

انځوريز راپور: مهاجرت په آلمان کي

آلماني ټولنې کې ادغاميدل، آسانه که ګران؟

د «فورشونګسګروپه والن» موسسې لخوا تازه د ترسره شوي ټولپوښتنه ۵۸ سلنه ځواب ورکونکي (آلمانيان) داسې فکر کوي چې په هيواد کې يې تر ټولو لويه ستونزه مهاجر او په آلمانۍ ټولنه کې د هغو د ادغام مسئله ده.

انځوريز راپور: مهاجرت په آلمان کي

تګ او راتګ

د ۲۰۱۵ کال په پرتله په ۲۰۱۶ کال کې آلمان کې د مهاجرو شميره کمه وه. خو د دې سربيره د ټولپوښتنې درې په دويمه برخه ګډونوالو انديښنه ښوولې چې مهاجرت کولی شي د جرمونو کچه پورته یوسي.

انځوريز راپور: مهاجرت په آلمان کي

د ژبې زده کړه یوه تر ټولو اړينه موضوع

په آلماني ټولنه کې د پرمختک لپاره تر ټولو مهم څه د آلماني ژبې زده کړه ده. حکومت په همدې موخه مهاجرو ته وړيا کورسونه په لاره اچوي. دا ادغام يوه مهمه برخه ده.

انځوريز راپور: مهاجرت په آلمان کي

ادغام ته هڅې

مهاجرو سره د ادغام په بهير کې د حکومت د رسمي پروګرامونو تر څنګ، عام خلک هم په داوطلبه توګه برخه اخلي. ډیری آلماني کورنۍ د مهاجرو سره نژدې اړيکي او ښه مناسبات لري.

انځوريز راپور: مهاجرت په آلمان کي

د چټک ادغام په موخه مختلفې لارې چارې

مهاجرو او ځايي خلکو تر منځ ورزشي فعاليتونه، ګډ تمرينات او د سياليو ترسره کول د ادغام په برخه کې يوه بله مثبته هڅه ده.

انځوريز راپور: مهاجرت په آلمان کي

په آلمان کې د مهاجرو يو کمپ

په ۲۰۱۵ کال کې آلمان مهاجرو لپاره په عاجله توګه کمپونه او هستوګنځایونه جوړ کړل. لا هم ډیری دغه کمپونه فعال دي.

انځوريز راپور: مهاجرت په آلمان کي

د کمپ له وړو ګډو کوټو تر لوکسو کورونو

آلمان حکومت، د مهاجرو لپاره له کمپونو نيولې تر لوکسو کورونو پورې هستوګنځایونه برابروي. په يوه تازه نظر پوښتنه کې آلمانيانو له حکومته غوښتي چې پر مهاجرو دې مصرفونه کم کړي.

انځوريز راپور: مهاجرت په آلمان کي

په کمپ او هايمونو کې د مهاجرت ژوند

کمپونه او هايمونه په آلمان کې د مهاجرو لمړي او موقت کورونه ګڼل کيږي. په تصوير کې يوه افغان مهاجره کورنۍ په افغاني دود د ډوډۍ خوړلو په حال کې.

انځوريز راپور: مهاجرت په آلمان کي

د مهاجرو ثبت او راجستر دوام لري

د آلمان د مهاجرت ادارې د آمارو له مخې سږکال دغې ادارې شاوخوا ۳۰۰ زره کسان ثبت کړي دي. له بل لورې د تيرکال په پرتله د مهاجرو په شمير کې کموالی راغلی دی.

انځوريز راپور: مهاجرت په آلمان کي

مرکل د مهاجرو په زړونو کې

د آلمان صدراعظمه انګلا مرکل په مهاجرو کې ډیره محبوبه ده، خو د هغې مهاجرت پسنده سیاست په خپله آلمانيانو کې د هغې د محبوبيت د کميدو سبب واقع شو. له همدې وجې مرکل د روان کال په ايالتي ټاکنو کې خپلې زياتې رايې له لاسه ووتې.

انځوريز راپور: مهاجرت په آلمان کي

له مرکل څخه ملاتړ بيرته زيات شوی

مرکل بيرته محبوبه شوې. د يوه تازه ټولپوښتنې ۵۹ سلنې ګډونوالو ويلي دې چې دوې به له مرکل څخه ملاتړ کوي. دا رقم د سپټامبر مياشتې په يوې بلې ټولپوښتنې ۱۳ سلنه ښکته وو. مرکل راتلونکي کال عمومي ټاکنو کې بيا صدراعظمې ته ځان نوماندوي.

انځوريز راپور: مهاجرت په آلمان کي

مهاجرو سره مخالفتونه

که له يوې خوا ګڼ شمير آلمانان له مهاجرو سره خواخوږي دي له بلې خوا ځينې مخالفان هم لري. د مخالفتونو دغې خبرې کله کله آن تر اور اچونو پوري رسيږي.

انځوريز راپور: مهاجرت په آلمان کي

سوځيدلی کمپ

په ځينو اروپايي ملکونو لکه فرانسه او يونان کې د تاوتريخوالو له امله کمپونو کې اورلګيدنې رامنځ ته شوي. په المان کې بيا د اور لګيدنې پيښې ډیرې وړې وي.


 

موږ تعقيب کړئ