اروپايي ټولنه: په ایران کي دي له تاوتریخوالي ډډه وسي

د ايران د رهبرۍ پرضد سختو احتجاجو ته په کتو سره اروپايي ټولني له ټولو اړخونو څخه غوښتي دي، چي له تشدد څخه لاس واخلي. امريکا د ایران د وضعیت په هکله د امنیت شورا د فوق العاده غونډي غوښتنه کړې.

د اروپايي ټولني د خارجي سیاست مسؤلي فدريکا موگریني له ټولو اړخونو څخه غوښتي دي، چي له تشدد او تاوتریخوالي څخه لاس واخلي. دې ټینگار وکړ، چي په اوس وخت کي په ایران کي «تاوتریخوالی زور اخلي او انسانان له منځه، چي دا د نه منلو وړ خبره ده.» موگریني زیاته کړه چي «سوله ایزي مظاهرې او د بیان ازادي داسي اساسي حقونه دي چي باید بې له استثنأ څخه هر چیري او په هر هیواد کي اعتبار ولري.»

د فرانسې جمهوررئيس ایمانوئیل ماکرون د ايران جمهوررئيس حسن روحاني ته خبردراری ورکړ او غوښتنه يې ترې وکړه، چي د حکومتي ضد احتجاجونو په مقابل کي له تعادل څخه کار واخلي. د فرانسې د جمهوري ریاست ماڼۍ په حواله ماکرون له روحاني سره په تلیفوني خبرو کي په عین حال کي د قربانیانو د تر اوسه پوري لوړ تعداد په اړه اندیښنه ښکاره کړې ده.

ویل کیږي چي ماکرون له روحاني څخه غوښتي دي چي د بیان د ازادۍ او مظاهرو حق ته دي احترام وکړي. په روانه اوونۍ کي تهران ته د فرانسې د بهرنيو چارو د وزیر سفر هم ځنډیدلی دی.

«د ایرانیانو د ازدي غوښتني ملاتړ»

امريکا متحد ايالات غواړي د ایران د حالاتو په هکله د امنیت شورا فوق العاده غونډه راوبولي. په ملگرو ملتونو کي د امریکا سفیري نیکي هيلي ويلي دي چي په د بشري حقوقو په برخه کي د ملگرو ملتونو شورا هم باید په راتلونکو ورځو کي د ایران له دوامدراه ناارمیو سره مشغوله سي. ددې په خبره نړیواله ټولنه باید د ایرانیانو د آزادۍ له غوښتنو څخه ملاتړ وکړي.

هیلي په عین حال کي هغه تورونه رد کړل، چي گويا اوسني اعتراضونه له خارج څخه حمایه او تشویق سوي دي. دې زیاته کړه: «موږ ټوله پوهیږو چي دغه خبره هیڅ اساس نه لري. مظاهرې کاملأ پخپله او دفعتاً رامنځته سوې او د ایران په ټولو ښارونو کي جریان لري. داسي معلومیږي چي له ډیره وخته تر فشار لاندي ولس غواړي د دیکتاتورۍ پرضد خپل ږغ پورته کړي.»

ترمپ پر اختلاس گر رژیم باندي انتقاد وکړ

د امريکا متحدو ايالاتو جمهوررئيس دونالد ترمپ په دې منځ کي په تویتر کي د ایران پر رهبرۍ باندي خپلو انتقادونو ته دوام ورکوي. هغه لیکلي دي چي «د ایران ولس د بې رحمه اختلاس گر رژیم پرضد راپورته سوی دی.»

له ایران سره د نړیوالي ټولني له خوا د اټومي معاملې په ارتباط ترمپ اضافه کړه: «هغه ټولي پیسې چي جمهوررئيس بارک اوباما دوی ته ورکړي دي، هغه ټوله د ترهگرۍ په لار کي مصرف سوي او یا خپلو جیبو ته لویدلي دي.»

په اروپا پارلمان کي د جرمني وکيل ایلمر بروک د ايران د رهبرۍ په مقابل کي د اروپايي ټولني له خوا د ډیر تعادل څخه خبرداری ورکړ او له تهران سره یې د اټومي معاملې څخه اندیښنه ښکاره کړه. هغه یوې المانۍ ورځپاڼي ته ویلي دي چي په ایران کي خلگو د ازادۍ او اقتصادي پرمختگ د لیدو هیله درلوده. خو رژیم متأسفانه ډیري پیسې په نیابتي جنگونو، مثلأ سوریه یا یمن کي ولگولې.

dpa,afp(Q.N/N.Z)

زموږ له ارشيف څخه:

په ايران کي له تاوتريخوالي ډکي مظاهرې

هغه ويډيوگاني او خبرونه چي له ايران څخه په ټولنيزو رسنيو کي خپاره سوي دي، ښيي چي په تهران، دماوند، شاهين شهر، اراک، قزوين، ساوه، همدان، کرج، تويسرکان، مراغه، ايذه، بهشهر، کرمانشاه، سنندج، خوی، اليگودرز او څو نورو ښارونو کي له امنيتي ځواکونو سره تاوتريخوالی رامنځ ته سوی دئ.

په ايران کي له تاوتريخوالي ډکي مظاهرې

په ټولنيزو شبکو کي داسي خبرونه خپاره سوي چي وايي مظاهره چيان پر سړکانو باندي د «استقلال، آزادۍ، مرگ پر ديکتاتور» او داسي نور شعارونه ورکوي.

په ايران کي له تاوتريخوالي ډکي مظاهرې

د ايران جمهوررئيس پخپله دوهمه وينا کي د دوشنبې په ورځ وويل: «زموږ ملت يو اقليت او يوه کوچنی ډلې ته چي د قانون او د خلکو د غوښتنو خلاف شعار ورکړي او مقدساتو ته توهين وکړي، ډير ښه ځواب ووايي.»

په ايران کي له تاوتريخوالي ډکي مظاهرې

د ايران د ځينو ښارونو سړکانو او کوڅو ته په زرونو ځوانان راوتلي دي. مظاهرې د پنجشنبې په ورځ لومړی په مشهد ښار کي د بې کارۍ او بيه د لوړوالي پرضد پيل او وروسته ډير ژر نورو ښارونو ته وغځېدلې.

په ايران کي له تاوتريخوالي ډکي مظاهرې

د وروستيو راپورونو له مخي په دغو مظاهرو کي تر اوسه پوري تر ۲۰ زيات انسانان وژل سوي دي.

په ايران کي له تاوتريخوالي ډکي مظاهرې

د ايران د مجلس ځينو استازو هم د تويتر له لارې له خلکو غوښتي دي چي د بېگانه وو په خبرو پسې سر و نه گرځوي او له تاوتريخوالي ډډه وکړي.

په ايران کي له تاوتريخوالي ډکي مظاهرې

په دې تاوتريخوالي کي تر اوسه پوري ځينو ځايونو ته اورونه هم اچول سوي دي.

په ايران کي له تاوتريخوالي ډکي مظاهرې

په ايران کي په تيرو مظاهرو کي لکه په ۹۶هجري لمریزکال کي هم د مظاهرو پرمهال پر سړکانو ولاړو موټر او دوکانونو ته اور اچول سوی وو. انځور د پخوانيو مظاهرو دئ.

په ايران کي له تاوتريخوالي ډکي مظاهرې

په ټولنيزو رسنيو کي خلکو عامه شتمنیو ته د زيان رسولو پرضد سخت غبرگونونه ښوولي دي.

په ايران کي له تاوتريخوالي ډکي مظاهرې

په ايران کي رسنيو د مظاهرو په پنځمه ورځ ويلي چي، وروسته له هغه چي په ځينو ځايونو کي مظاهرې په تاوتريخوالي اوښتي تر اوسه پوري تر ۲۰ زیات کسان وژل سوي دي.

په ايران کي له تاوتريخوالي ډکي مظاهرې

د وروستيو راپورونو له مخي تر اوسه پوري تر ۱۰۰ زیات مظاهره کوونکي نيول سوي دي.

په ايران کي له تاوتريخوالي ډکي مظاهرې

که څه هم چي دغه مظاهرې د بيو د لوړوالي پرضد په مشهد کي پيل سوې، خو وروسته ډير ژر ځينو نورو ښارونو ته هم وغځېدلې او شعارونو يې بدلون وموند. په دې مظاهرو کي اوس د حکومت ضد شعارونه ورکول کيږي.

موږ تعقيب کړئ