"القاعدې بيا په الوتکه کي د چاودني هڅه کوله"
۱۳۹۱ اردیبهشت ۱۹, سهشنبه
د دغو چارواکو په حواله لاس ته راغلی بم د ۲۰۰۹ کال د نوي کال د ورځي د بم یو پرمختللی ډول وو.
یوه امریکايي چارواکي ویلي دي چي په یمن کي د القاعدې د ډلي هغه پلان چي غوښتل ئې د یوه هوایي شرکت یوې الوتکي ته انفجار ورکړي، د CIA له خوا شنډ شوی وو.
د FBI له خوا په یوه خپره شوې خبر پاڼه کي راغلي دي چي کشف شوی بم هیڅ کله هم کم چا ته گواښ نه و رامنځ ته کړی: «دې چاودیدونکي توکي د عامو خلکو امنیت ته کوم کواښ نه و رامنځ ته کړی. امریکا له خپلو نړیوالو ملگرو سره د دې موادو په اړه خبري کوي.»
د رپوټونو په حواله تر کشفیدو مخکي د دې بم له پاره کوم هدف نه وو ټاکل شوی او دا چي د کوم چا له خوا د يوې الوتکي له پاره کوم ټکت هم نه و اخیستل شوی. تر اوسه پوري د ځانمرگي برید کوونکي په اړه نور معلومات روښانه نه دي.
د چارواکو په حواله لومړنۍ څېړني ښیي چې دا یو داسي بم دئ چي تردې مخکي هم په سیمه کي د القاعدې له خوا کارول شوی دئ.
اوباما په اپریل کي د پيښي په اړه معلومات درلودل
د سپيني ماڼۍ ویاندي کیتلن هایدین، ویلي دي چي ولسمشر اوباما ته لومړی د اپریل په میاشت کي د دې پيښي په اړه معلومات ورکړل شوي ول. د ویاندي په خبره، هغه وخت هم اوباما ته ویل شوي ول چي د کوم وگړي وضعيت له گواښ سره مخامخ نه وو. د کیتلن په خبره د پیښي په اړه د معلوماتو د ترلاسه کولو وروسته، ولسمشر اوباما د امریکا امنیتي او استخباراتي ادارو ته ویلي ول چې په راتلونکې کي د داسې پېښو مخنیوي وکړي.
آژانسونه/ مسعود جهش
کتونکی: نجیب الله زیارمل