امریکا د ملا فضل الله پر سر ۵ میلیونه ډالره انعام ټاکلی

امریکا متحدو ایالاتو ويلي دي چې دوی د پاکستاني طالبانو د مشر ملا فضل الله په هکله د معلوماتو له پاره ۵ میلیونه ډالر انعام ټاکلی دی.

دغه وړاندیز په داسې یوه وخت کې کیږي چې د امريکا متحدو ایالاتو او پاکستان ترمنځ اړیکې ډیري ترینګلې شوي او په ورته وخت کې یو پاکستانۍ هيئت همدا اوس واشنګټن ته په رسمي سفر تللی، تر څو د ترهګرۍ ضد مبارزې په هکله همکاري لا ډیره کړي. د دې هيئت د بحث بله ممکنه موضوع په افغانستان کې د امریکا د جګړې نوې ستراتیژۍ هم په ګوته کیږي.

که څه هم د پاکستاني طالبانو جنګیالي لا هم بریدونه ترسره کوي، خو یادي ډلې د ۲۰۱۴م کال په دیسمبر میاشت کې د پوځ پر یوه ښوونځي تر برید وروسته چې پکې ۱۳۲ ماشومان ووژل شول، په پاکستان کې تر خپلې ولکې لاندي ټولي سیمې له لاسه ورکړي دي.

دا په داسې حال کې ده چې د امریکا د بهرنیو چارو وزارت په پاکستاني طالبانو پوري تړلې د بلې ډلې پر مشر عبدالولي او همدا راز د ناټو ځواکونو پر کاروانونو باندي برید کوونکې په پاکستاني طالبانو پوري تړلې د یوې بلې ډلې پر مشر منګل باغ باندي هم درې درې میلیونه ډالر انعام ټاکلی دی.

د امریکا د بهرنیو چارو وزارت په یوه خپره شوې اعلامیه کې په دې هکله ویلي چې: «باور کیږي چې دغو ټولو کسانو د ترهرګرۍ عملونه یا ترسره کړي او یا یې هم د ترسره کولو ستر ګواښ لیدل کیږي کوم چې د متحدو ایالاتو او همدا راز د دې هیواد اتباعو ته امنیتي ګواښ رامنځ ته کوي.» د پاکستان د بهرنیو چارو وزارت تراوسه پوري په دې هکله د تبصرې غوښتني ته ځواب نه دي ویلي.

واشنګټن او کابل پر پاکستان تور پوري کوي چې دغه هیواد افغان طالبانو او په دوی پورې تړلې د حقاني شبکې جنګیالیو ته پټنځای برابروي. پاکستان بیا دغه تورونه ردوي او وايي چې پاکستاني طالبانو په ګاونډي افغانستان کې پټنځایونه لري.

د روان کال په جنوري میاشت کې د امریکا ولسمشر دونلد ترمپ پاکستان ته د امنیتي مرستو په چوکاټ کې شاوخوا ۲ میلیادره ډالره مرستي قطع کړي او وايي چې پاکستان د افغان طالبانو او همدا راز د حقاني شبکې پر ضد په اقداماتو کې پاته راغلي دي.

د امریکا د بهرنیو چارو وزارت په اعلامیه کې همدا راز راغلي دي چې د وسله والو ډلو درې واړه مشران پاکستان او همدا راز په افغانستان کې میشت د ائتلافي ځواکونو سرتیرو ته ګواښونه رامنځ ته کوي. په اعلامیه کې دغه راز راغلي دي چې پاکستاني طالبان چې په اوردو ژبه کې تحریک طالبان پاکستان یا «ټي. ټي. پي» نومیږي، په امریکا کې دننه یې هم د بریدونو ګواښونه کړي. یادي ډلې په ۲۰۱۰م کال کې د نیویارک ښار په ټایم سکویر کې د ناکامه برید مسئولیت هم منلی دی.

دغې ډلې د ۲۰۱۲م کال په اکتوبر میاشت کې د هغې وخت د نجونو د تعلیم په برخه کې فعاله ۱۱ کلنه ملاله یوسفزی هم په ډزو ویشتلې وه. ملاله یوسفزۍ بیا وروسته په ۲۰۱۴م کال کې د نوبل د سولي جایزه هم وګټله.

د امریکا د بهرنیو چارو وزات وايي چې عبدالولي په پاکستاني طالبانو پوري تړلی د جماعت الحرار ډلې مشري پر غړه لري، چې پر ملکیانو، مذهبي اقلیتونو او همدا راز پوځ او قانون پلي کوونکو ادارو پر چارواکو بریدونه کوي. یادي ډلې په پیښور ښار کې د امریکا د متحدو ایالاتو د قونسلګرۍ دوه ملکي کارکوونکي هم وژلي دي.

یاد وزارت زیاتوي چې منګل باغ بیا په پاکستاني طالبانو پوري تړلي د لښکر اسلام ډلې مشري کوي چې د نشه يي موادو په انتقال، قاچاق او ههمدا راز د پاکستان او افغانستان ترمنځ له سوداګرۍ په جبري ډول مالیه ټولوي.

د پاکستاني طالبانو د مشر ملا فضل الله زوی په کونړ کي وژل شوی

دا په داسې حال کې ده چې د تیرې چهارشنبې په ورځ د امریکا یوې بې پیلوټه الوتکې د افغانستان په یوه لیرې پرته سیمه کې د ترهګرو پر یوه روزنیز مرکز برید کړی چې پکښې د پاکستاني طالبانو۲۰ جنګیالي وژل شوي دي. د رپوټونو په حواله دغه برید په کونړ ولایت کې شوی او ویل کیږي چې وژل شويو جنګیاليو په پاکستان کې ځانمرګو بریدونو ته چمتوالی نیوو.

په سوات کې د پاکستاني طالبانو تر واکمنۍ وروسته د سیلانیانو په هکله انځوریز البوم، زموږ له آرشیف څخه:

د سوات په دره کې د ترورستي پيښو وروسته سیاحت

د سوات دره د سیلانیانو له پاره په زړه پوري ځای

د ۲۰۰۹ کال تر پوځي عملیاتو دمخه دغه دره د طالبانو د تمرینونو په میدان بدله شوې وه. په دې ځای کې نه یوازي دا چې د وژنو او شوکو بازار ګرم وو، بلکې سیاحت هم ختم شوی وو.

د سوات په دره کې د ترورستي پيښو وروسته سیاحت

د ختیځ سويس

د سوات دره د خپلي طبیعي ښکلا له امله د ختیځ د سويس په نوم مشهوره ده. د سوات دره د پاکستان د پلازمېنې اسلام آباد په ۳۹۰ کیلومترۍ کي د خیبر پښتونخوا شمال لور ته پرته ده. د دغي درې ۸۰ سلنه وگړي د سیاحت سکتور لا لاري خپل ژوند تیروي.

د سوات په دره کې د ترورستي پيښو وروسته سیاحت

د تروریزم ښکار شوې دره

په تیرو ۱۸ کلونو کې ياغيانو د سوات درې سیاحت او اقتصاد ته ډیر زیات تاوان رسولی دی. د پاکستان د تحریک نفاذ شریعت محمدي مشر مولانا صوفي محمد او د هغه پلویانو په ۱۹۹۶ میلادي کال کې د شریعت د نافذولو غږ پورته کړ او په مختلفو لارو يي سوات ته د سیلانیانو د ورتګ مخه ونیوله.

د سوات په دره کې د ترورستي پيښو وروسته سیاحت

د نجونو پر زده کړو او تفریح بندیز

له ۲۰۰۷ کال راهیسي د مولانا فضل الله ډلي د سوات درې اقتصاد او سیاحت ته ډیر زیان رسولی دی. د خلکو وژل، د ښوونځیو، دولتي ودانیو، پلونو، او په بمونو د سیاسي ځایونو الوزول ورځنی معمول وګرځید. ښځي بايد يوازي په کورونو کي کښېني او د نجونو پر زده کړو باندي بندیز ولګول شو.

د سوات په دره کې د ترورستي پيښو وروسته سیاحت

د اقتصادي سکتور زیامن کیدل

د سوات د هوټلونو د ټولني او سیاحت ادارې په حواله، په دغه سيمه کي د دغو ګډوډیو پرمهال د هوټولو سکتور ته ۷ میلیارده او په مجموع کي د دغي سیمي اقتصاد ۸۰ میلیارده پاکستاني کلداري زیان لیدلی دی.

د سوات په دره کې د ترورستي پيښو وروسته سیاحت

تر پوځي عملیاتو وروسته د سیلانیانو دلچسپي

په ۲۰۰۹ کال کې د پاکستاني پوځ له خوا د کامیابه عملیاتو د ترسره کیدو او امنیت ټینګولو وروسته، سوات یو ځل بیا د سیلانیانو پام ځانته راواړاوه. د ایالتي حکومت او پوځ له خوا تر سره کیدونکو میلو سیلانیان یو ځل بیا را جذب کړل او ډیر کورني او بهرني سیلانیانو سوات ته مخه کړې ده.

د سوات په دره کې د ترورستي پيښو وروسته سیاحت

د سیلانیانو د لیوالتیا لوی مرکز

د سوات دره د کورني او بهرنیو سیلانیانو له پاره د ډیري دلچسپۍ وړ سیمه ده. په سوات کې ډیري زړه راکښونکي او ښایسته درې موجودي دي، د بیلګې په توګه ، کالام، مدین، بحرین، مرغزار، او د میاندم مهوډنډ د جهیل سیمې د سیلانیانو له پاره ډیري په زړه پوري دي. د رسنیو په حواله په ۲۰۱۲ کال کې سوات ته د سلو زرو سیلانیانو په ورتگ سره د دغې سیمي د سیاحت شل کلن ریکارډ مات کړی دی.

د سوات په دره کې د ترورستي پيښو وروسته سیاحت

د سیاحت د پراختیا له پاره اړین ګامونه

د سیاحت د کارپوهانو په خبره د سوات سیاحت ته د پراختیا ورکولو په موخه باید د سړکونو جوړول، د سیلانیانو له پاره د اساسي امکانانو برابرول او د نورو تورستي ځایونو جوړول په پام کي ونیول شي.

د سوات په دره کې د ترورستي پيښو وروسته سیاحت

د بنسټیزو جوړښتونو رغول

د سوات د هوټلونو د ټولني د مشر زاهد خان په حواله، د دغي سیمي د اساسي جوړښتونو د بیارغوني له پاره، د لنډاکي څخه تر کالامه پوري د لوي لاري رغول او د سیلانیانو له پاره د اسانیاو برابرول نه یوازي دا چې د سیاحت د سکتور د پياوړتیا په برخه کي مهم رول لوبولی شي، بلکې د هیواد له پاره یوه لویه عایداتي منبه هم ګرځي.

د سوات په دره کې د ترورستي پيښو وروسته سیاحت

’’تر حده زیات ښکلا‘‘

له اسلام آباد څخه د خپلي کورنۍ سره کالام ته تلونکې مېرمن مشتاق وایی:« سوات ته الله پاک ډیره زیاته ښکلا ور بخښلې ده، دلته بیا بیا راتګ ته مي زړه غواړي، او زه د ټولي نړۍ خلکو ته بلنه ورکوم چې سوات ته راشي، دلته هیڅ خطر نشته.»

موږ تعقيب کړئ