ایران د اقتصادي فشار ډیریدو په صورت کې د افغانانو د اخراج ګواښ کړی

د ایران د بهرنیو چارو وزارت یوه لوړپوړي چارواکي ویلي دي چې که پر دې هیواد باندې د امریکا د بندیزونو له کبله د ایران د نفتو صادرات صفر ته ورسیږي، نو له افغان مهاجرو څخه په وغوښتل شي چې له ایران څخه ووځي.

د امریکا متحده ایالاتو ولسمشر دونالد ترمپ، پر ایران باندې سخت اقتصادي بندیزونه وضع کړي دي او په وروستیو وختونو کې یې هغه معافیتونه هم له منځه وړي دي چې ځینو هیوادونو ته د ایران د نفتو د رانیولو په برخه کې ورکړل شوي ول. امریکا ویلي چې هدف یې صفر ته د ایران د نفتو د صادراتو راکښته کول دي.

ایران د دغو نویو لا سختو بندیزونو پر وړاندې د چهارشنبې په ورځ غبرګون وښود او د ۲۰۱۵ کال اتومي تړون ته یې خپل ژمنې یو څخه کمې کړې. دا په داسې حال کې ده چې واشنګټن لا یو کال مخکې په یو اړخیزه توګه له دې تړون څخه وتلی وو.

د ایران د بهرنیو چارو وزارت سیاسي مرستیال عباس عراقچي، د دې هیواد د تلویزیون دویمې شبکې ته ویلي دي چې که د دغو بندیزونو له کبله پر ایران باندې اقتصادي فشارونه ډیر شي نو باید افغان مهاجر له ایران څخه ووځي.

هغه په ایران کې د میشتو افغان کډوالو شمیر تر درو میلیونو ډیر وښود او ادعا یې وکړه چې دغو کسانو په ایران کې «تر دوو میلیونو ډیر کاري فرصتونه اشغال کړي او هر کال د درو او پنځو میلیاردو تر منځ یورو له ایران څخه بهر ته استوي».

دا په داسې حال کې ده چې د ایران د اقتصادي وضعیت له خرابیدو او د دې هیواد د پولي واحد د ارزښت له ټیټیدو سره، تیر کال ډیر شمیر افغانان له ایران څخه وتلو ته اړ شوي دي. د مهاجرت د نړیوال سازمان د شمیرو له مخې په ۲۰۱۸ کال کې نزدې ۸۰۰ زره افغان مهاجر د ایران پریښودو ته اړ شوي دي.

د ایران د بهرنیو چارو وزارت مرستیال همداراز ټینګار وکړ چې هر کال شاوخوا ۴۷۰ زره افغان زده کوونکي په وړیا توګه د ایران په ښوونځیو کې زده کړې کوي چې په کال کې د هر یوه د زده کړې لګښت ۶۰۰ یورو ته رسیږي. د هغه په خبره په ایران کې ۲۳ زره افغانان په پوهنتونونو کې هم زده کړې کوي چې په کال کې د هر یوه لګښت یې ۱۵ زره یورو ته رسیږي.

عراقچي ادعا وکړه چې په ایران کې د میشتو افغانانو کلنۍ لګښت اته میلیارده ډالرو ته رسیږي. هغه وویل: «که بندیزونه اغیزه وکړي او زموږ د نفتو خرڅلاو صفر ته ورسیږي، نو د ایران اسلامي جمهوریت اړ دی چې د خپل اقتصاد له پاره ځانګړی سیاست غوره کړي او کیدای شي په دې شکل دوام ور نه کړای شو او له خپلو افغانو ورونو او خویندو وغواړو چې له ایران څخه ووځي.»

د ایران د بهرنیو چارو وزارت سیاسي مرستیال عباس عراقچي، تینګار وکړ چې له دې هیواد څخه د افغان مهاجرو د اخراج د پایلو مسوولیت د امریکا متحده ایالاتو پر غاړه دی.

م. س. / ب. ص. (دویچه ویله فارسی)

زموږ له ارشیف څخه

روان کال له ایران او پاکستانه څومره افغان مهاجر ستانه شوي؟

د تورخم بندر له لاري پخپله خوښه

د روان کال د جنوري میاشتې له پیله نيولې د مې میاشتي تر ۱۹ نیټې پورې د تورخم بندر له لارې له پاکستانه پخپله خوښه ۷۱۶۸ کسان افغانستان ته ستانه شوي دي.

روان کال له ایران او پاکستانه څومره افغان مهاجر ستانه شوي؟

د تورخم له لارې ډیپورټ شوي

د روان کال د جنوري میاشتې له پیله د می میاشتې تر ۱۹ نیټې پورې د تورخم بندر له لارې له پاکستان څخه ټول ۴۰۵ کسان افغانستان ته ډیپورټ شوي دي.

روان کال له ایران او پاکستانه څومره افغان مهاجر ستانه شوي؟

د سپین بولدک له لارې په خپله خوښه

د سپین بولدک بندر له لارې له پاکستان څخه پخپله خوښه ټول ۶۵۲۴ کسان افغانستان ته ستانه شوي دي.

روان کال له ایران او پاکستانه څومره افغان مهاجر ستانه شوي؟

د سپین بولدک له لاري ډيپورټ شوي

د سپین بولدک له لارې له پاکستانه د روان کال له پیله د می میاشتي تر ۱۹ نیټې پورې ټول ۴۵۹ کسان ډیپورت شوي دي.

روان کال له ایران او پاکستانه څومره افغان مهاجر ستانه شوي؟

د هرات له لارې په خپله خوښه یا ناڅاپه

د هرات له لارې بیا په مجموعي ډول ۹۰ زره او ۷۰۶ کسان له ایران څخه بیرته افغانستان ته ستانه شوي دي.

روان کال له ایران او پاکستانه څومره افغان مهاجر ستانه شوي؟

د هرات له لارې ډیپورټ شوي

له ايران څخه ۲۳۵ کسان د هرات له لارې بيرته افغانستان ته اخراج شوي دي.

روان کال له ایران او پاکستانه څومره افغان مهاجر ستانه شوي؟

د نیمروز له لارې په خپله خوښه یا ناڅاپي ډول

د نیمروز له لارې له ایران څخه د روان کال له پیل نه نیولې تر د مې میاشتې ۱۹ نیټې پورې ټول ۳۱ زره او ۵۸۸ کسان افغانستان ته راستانه شوي دي.

روان کال له ایران او پاکستانه څومره افغان مهاجر ستانه شوي؟

د نیمروز له لارې ډیپورت شوي

د نیمروز له لارې په روان کال کې تر اوسه پورې ټول ۱۰۷ زره او ۱۹۸ کسان ډیپورت شوي دي.

روان کال له ایران او پاکستانه څومره افغان مهاجر ستانه شوي؟

له پاکستان څخه د راستانه شوو افغان کډوالو مجموعي شمیر

د روان ۲۰۱۸م کال له پیله د می میاشتي تر ۱۹ نیټې پورې د مهاجرت د نړیوال سازمان د شمیرو له مخې ټولټال ۱۴ زره او ۵۷۴ کسان بیرته افغانستان ته ستانه شوي دي. په دې کسانو کې پخپله خوښه، ناڅاپي او جبري اخراج شوي یا ډيپورټیان شامل دي.

روان کال له ایران او پاکستانه څومره افغان مهاجر ستانه شوي؟

له ایران څخه د راستانه شوو افغان کډوالو مجموعي شمیر

د روان ۲۰۱۸م کال له پیل نه نیولې د می میاشتي تر ۱۹ نیټې پورې د مهاجرت د نړیوال سازمان د شمیرو له مخې ټولټال ۲۸۴ زره او ۷۲۷ کسان بیرته افغانستان ته ستانه شوي دي. په دې کسانو کې په خپله خوښه، ناڅاپي او جبري اخراج شوي یا ډيپورټیان شامل دي.

موږ تعقيب کړئ